Bu gün azərbaycanlı şair, publisist Nüsrət Kəsəmənlinin doğum günüdür.
Kulis.az xəbər verir ki, mərhum şair 1946-ci il Ağstafa rayonunun Kəsəmən kəndində anadan olub.

Amansız keçən həyatını ən yaxşı formada şairin öz şeirləri təsvir edir.

Yarımçıq böyüyən uşaqlığını, kasadlıqla keçən gənclik illərini “Biri vardı, biri yox” şeirindəki “yox”larla bilmək olur:

Uzaqdaydı mən istəyən ocaqlar,

Ürəyimdən gəlib-keçdi sazaqlar.

Atalıydı, analıydı uşaqlar,

Bizim evdə biri vardı, biri yox.

Gözlərimə doldurmuşam yağışı,

Bir köynəkdə çıxarmışam mən qışı.

Şalvar-pencək geyinirdi tay-tuşum,

Məndə isə biri vardı, biri yox...

Ata nənəsinin himayəsində böyüyən Nüsrətin körpə olanda valideynləri ayrılıb. Ən ağrılı məqam isə anasının onu tapması olub. Şair uşaqlığını küçədə qarmon çalıb, qatarlarda alver edərək keçirib. Uzun illərdən sonra anası Nüsrəti görəndə huşunu itirib yıxılır. Məlum olur ki, vaxtilə qatarda ac olduğunu düşünüb çörək verdiyi uşaq onun oğlu imiş.

Nə qədər çətinlik çəksə də, Nüsrət təhsilini davam etdirir, universitetə qəbul olur. Həmin illərdə Sevda adlı xanımı sevir. Sevgiləri qarşılıqlı olsa da onlar ailə qura bilmirlər. Nüsrətə sevdiyi qızı kasıb olduğuna görə vermirlər. Beləcə, şair “Sevda”sını itirir...

Azərbaycan Dövlət Universitetinin jurnalistika fakültəsində təhsil aldığı illərdə "Bakı" və "Baku" qəzetlərində müxbir, ədəbi işçi vəzifələrinə qəbul edilib və bununla əlaqədar qiyabi şöbəyə keçirilib (1969).
Universiteti bitirdikdən sonra, Azərbaycan Yazıçılar İttifaqında referent və ədəbi məsləhətçi olub.

1960-cı illərin əvvəllərindən bədii yaradıcılığa başlayıb. 150-dək şeirinə musiqi bəstələnib. "Boş kəndlərin harayı", "Mövzu üzrə improvizasiya", "Ənbizlərin keşiyində", "Sovet Azərbaycanına səyahət" və s. sənədli filmlərin, "Afroditanın qolları", "Qarabağ əhvalatı" bədii filmlərinin ssenari müəllifıdir. Moskvada gənc yazıçıların VI, VII Ümumittifaq müşavirələrində iştirak edib.

Fəal ictimaiyyətçi olub: Azərbaycan Yazıçılar İttifaqında Həmkarlar Komitəsinin sədri (1981-1984), Mədəniyyət İşçiləri Həmkarlar İttifaqı Respublika Komitəsi Rəyasət Heyətinin üzvlüyünə namizəd, Azərbaycan Tarix və Mədəniyyət Abidələri Mühafizə Cəmiyyətinin üzvü, Azərbaycan Yazıçılar İttifaqının VI, VII qurultaylarında idarə heyətinin üzvü, poeziya şurasının sədri seçilib.
C.Cabbarlı adına "Azərbaycanfilm" kinostudiyasında baş redaktor işləyib. "Dünyaya pəncərə" sənədli televiziya verilişinin ssenari müəllifi və aparıcısı olub.

Şair, publisist, Azərbaycan Yazıçılar Birliyinin üzvü, respublika Lenin komsomolu mükafatı laureatı Nüsrət Kəsəmənlinin məşhur şeirləri sırasında: "Daha nağıllara inanmıram mən", "Biri vardı, biri yox...", "Səni unutsam...", "Vətən alov etsin odunu sənin", "Mənsiz qalacaqdır bu dünya birgün", "Oğru olmaq istəyirəm", "Ağacın altında kölgə", "Qoyunlar yeyəcək canavarları...", "Məhəbbətdən küsəndə", "Yoxdusa", "Mənim o ağaca yazığım gəlir...", "Mənə inanmırsan bir yuxu kimi", "İnanma əzizim, inan əzizim"in adlarını qeyd etmək olar.

Nüsrət Kəsəmənli 16 oktyabr 2003-cü ildə Təbrizdə vəfat edib.

• Cəhalətə meydan oxuyan şair - Seyid Əzim Şirvani millətin gözünü necə açdı?
• Tanınmış alim vəfat etdi
• İranda konsul işləyən, "xalq düşməni" kimi güllənən qardaşlar - SSRİ onları necə ələ keçirdi?