Kulis.az İlham Qəhrəmanın bayatılarını təqdim edir.

Dirəyim, milim ağac,
Budağım, qolum ağac.
Dövrəsində gözəllər,
Yerinə olum, ağac.

*
Göl dedin – dərin məlum,
Suyunda sərin məlum.
Bağda tək gəzən canan,
Heç deməz yerin məlum.

*
Naz səndə, qəmzə səndə,
Dur, bəzən, Qəmzə, sən də!
Hakimlər bilməz olsun –
Silahdır qəmzə səndə!

*
Apardı bir yol məni,
Gül deyir dur, yol məni.
Xəncərdən qaşmı düşər,
Soruşmaz bir yol məni?!

*
Qəmim var görəcəkdi,
Nə yalan, nə gerçəkdi?!
Ürəyimə od saldı,
Ətəyin geri çəkdi.

*
Ay gedən pəri, kimsən,
Dön görüm bəri kimsən?!
Sənki gözəlsən belə,
Canıma şərikimsən.

*
Boy verdi günəbaxan,
Boyuna yenə baxam.
Yoruldum deyərəmmi,
Mən yüz il sənə baxam?!

*
Hicranı xallat, gözüm,
Kirpiyin sallat, gözüm!
Gözəllər bizə baxmaz,
Bax bizi allat, gözüm.

*
Mən görən sevər gözüm,
Gül camal sevər gözüm.
O gələn gözələ bax,
Gözünə su ver, gözüm!

*
Səsə oynadı gözüm,
Dayan, tay nədi, gözüm?!
Azmı gözələ baxdın,
Gözün doymadı, gözüm?!

*
Qoymadı yöndə məni,
Saxladı gendə məni.
Onda mən onu tapdım,
Görmədi məndə məni.

*
Göy tavan, Yer döşəmə,
Xalını tərs döşəmə.
Aşiq istər yarından –
Dil dişləyə, döş əmə.

*
Dövrdə dövranlıq az,
Al beli, Bayramlı, qaz,
O gün təqvimə baxdım –
Bayram çox, bayramlıq az.

*
Əkini əkən yoxdu,
Toxumu səpən yoxdu.
Hakimlər işmi kəsir,
Adımı çəkən yoxdu?!

*
Durnası səfdə dünya,
Qızılı küpdə dünya.
Düzü zavala gəlmiş,
Əyrisi kefdə dünya.

*
Bir kənd gördüm – Zərqava,
Zəhmət üzdə tər qova.
Gərdişdə adət budur ¬–
Maya qaça, nər qova.

*
Yolu şamlı Maştağa,
Şam dibində məst ağa.
Yar dağda, hava isti,
Ey meh, dəm-dəm əs dağa!

*
O mən görən Mərdəkan,
Bağ-bostanın mərd əkən.
Namərdin qolu sına,
Harda qazsa, mərdə kan.

*
O mən görən Türkandı,
Darda bizi türk andı.
Çox sınaqdan çıxıbdı,
Türk vəfası, türk andı.

*
Mən görən Oğuldərə,
Güz barlı – noğul dərə.
Atalar bağ salarlar,
Bəhərin oğul dərə.

*
O kənd bizim Cicimdi,
Evlər xalça, cicimdi.
Şəfqətli xanım görsən
Denən: mamam, cicimdi.

*
Bu mal köç malı deyil,
Dağa köçməli deyil.
Ağzımda tuti dilim,
Dərdim açmalı deyil.

*
Yekədən yekə fələk,
Dərd vurdu yükə fələk.
Təklərin göz damcısın
Gözə kim tökə, fələk?!

*
Qarşıma yarım çıxdı,
Dolular yarım çıxdı.
Mən yolu başa vardım,
Yol yenə yarımçıqdı.

*
O mən görən çatıdı,
Bayram gəldi çatıdı.
Daş dəymiş şüşə kimi
Ürəyimin çatıdı.

*
Qar basdı, ağac aşdı,
Gün getdi dağdan aşdı.
Novruzda gözüm qalan,
Şəkərburadı, aşdı.

• "Star Trek" pərəstişkarlarından tarixi Ginnes rekordu
• "Sevgililərinizin neçə nəfər olmasının nə əhəmiyyəti var, əgər..." - Jak Lakan
• "Keçmişin boz şirəsi bütün sənətkarlığı məhv edir..." - Con Eşberidən sitatlar