Bu gün görkəmli şair, riyaziyyatçı, astronom və filosof Ömər Xəyyamın anım günüdür.

Kulis.az onun rübailərini Mirmehdi Seyidzadənin tərcüməsində təqdim edir.

Sadəlövh könlümdən mən cana gəldim,
Cəfakeş canımdan fəğana gəldim,
Mənsiz də dünyanın işi keçərmiş,
Əcəba, nə üçün cahana gəldim?!

***

Biz getsək yenə də duracaq cahan,
Bizdən qalmayacaq bir iz, bir nişan.
Biz yoxkən çəkmirdi o heç bir zərər,
Getsək də görünməz onda bir nöqsan.

***

Kuzəni, qədəhi alıb, ay gözəl,
Bir bulaq başına, çəmənzarə gəl!
Çox ayüzlüləri bu fələk yüz yol
Kuzəyə döndərib, məhv edib əcəl.

***

Xəbərin varmıdır, ağarınca dan,
Nə üçün xoruzlar qaldırır fəğan?
Deyirlər: ömründən keçən gecəni,
Dur, seyr et səhərin saf aynasından.

***

Sən könül qırmağı eyləsən adət,
İnsan incitməyi bilsən səadət,
Ağlın matəmində otur, ey nadan!
Bil ki, əskik deyil səndən rəzalət.

***

Könül, rast gəlməsən tikana, xara,
Yetişə bilməzsən gül üzlü yara.
Yüz parça olmasa darağın bağrı,
Heç əli çatarmı ipək saçlara!..

***

Keçir külək kimi ömrün karvanı,
Qənimət bilməli zövqü, səfanı.
Saqi, gəl sabahı düşünmə, mey ver,
Keçir gecə, gedir işrət zamanı.

***

Biz qəflət toruna düşmüş bir quşuq,
Dünyanın dərdindən cana doymuşuq.
Nə gəlmək arzumuz olub, nə getmək.
Bu damsız, qapısız yerə uymuşub.

***

Ey könül, elə bil sənindir cahan!
Sən şadlıq bağında şənsən hər zaman.
Bir gecə çəmənə düşən şeh kimi,
Səhər birdən-birə yox olacaqsan.

***

Tutaq, hər arzunu götürdün, sonu?
Həyat kitabını bitirdin, sonu?
Elə bil yaşadın yüz il, ömrünü
İkinci yüz ilə yetirdin, sonu?

***

Ey Xəyyam, bədənin çadıra bənzər,
Ruh isə sultandır, bəqadə gəzər.
Sultan duran kimi əcəl fərraşı,
Başqa bir mənzildə çadırı bəzər.

***

Pərişan saçına uzatdımsa əl,
Ona məhəbbətdən bağladım əməl.
Saçlarında gördüm dəli könlümü,
Odur əl uzatdım ona, ey gözəl.

***

Ariflər yaratmış sözdən dürr, gövhər,
Göylərin işindən qalmış bixəbər.
Cahanın sirrini aça bilmədən,
Bir neçə söz deyib çıxıb getmişlər.

• "Sən demə, o da mənim pullarımı yeyirmiş" - Aktyordan etiraf
• "Öz balaca həyatlarından xatircəmdirlər..." - Belçikalı Nobel mükafatçısının pyesi
• “İliada” dastanına aid nadir papirus parçası tapıldı