Bu gün britaniyalı romançı, şair Laurens Corc Durrellin anım günüdür.

Kulis.az onun əsərlərindən sitatları təqdim edir.

Ürək nəyi arzulayırsa, onu ruhun hesabına əldə edir.

***

Ən zəngin sevgi vaxtın mühakiməsinə boyun əyən sevgidir.

***

Sevilən obyekt, sadəcə olaraq, eyni zaman anında narsisistik şəkildə eyni təcrübəni paylaşan biridir və sevilən obyektə yaxın olmaq arzusu ilk növbədə ona sahib olmaq fikrindən deyil, sadəcə iki təcrübənin müxtəlif güzgülərdəki əkslər kimi müqayisə olunmasına imkan verməkdən irəli gəlir. Bütün bunlar ilk baxışdan, öpüşdən və ya toxunuşdan əvvəl, iddiadan, qürurdan və ya paxıllıqdan əvvəl, dönüm nöqtəsini qoyan ilk bəyanatlardan əvvəl gələ bilər - çünki buradan etibarən sevgi vərdişə, sahiblənməyə və yenidən tənhalığa doğru tənəzzül edir.

***

Bəlkə də bizim tək xəstəliyimiz bir-birimizdən uydurduğumuz nağıllarla kifayətlənmək əvəzinə, dözə bilməyəcəyimiz bir həqiqəti arzulamağımızdır.

***

Biz hamımız cəfəngiyyata inanmaq üçün məntiqli səbəblər axtarırıq.

***

Həqiqət qadındır. Sirli olmasının səbəbi də budur.

***

Həyat düşündüyümüzdən daha mürəkkəb, amma hər kəsin təsəvvür etməyə cürət etdiyindən dəfələrlə sadədir.

***

Səyahət özünüdərkin ən faydalı formalarından biri ola bilər.

***

İnanmıram ki, insan reallıqdan qaçmaq üçün mütaliə etsin. İnsan mövcudluğunu bildiyi, lakin özünün yaşamadığı bir reallığı təsdiqləmək üçün oxuyur.

***

Bütün gənclər kimi mən də dahi olmaq üçün yola çıxmışdım, lakin xoşbəxtlikdən gülüş araya girdi.

***

Ruhun gözləri taybatay açıq halda və həddindən artıq faktiki informasiya yükü olmadan səyahət etməyə çalışın. Ehtiram göstərmədən, asudə, lakin daxili diqqətlə köklənmək lazımdır. Bu, hiss etməkdən, həmin o sirli ünsiyyət duyğusundan, torpaqla eyniləşməkdən ibarətdir. Yolu öyrəndikdən sonra bir məkanın mahiyyətini ortaya çıxara bilərsiniz. Sadəcə bir iynə kimi hərəkətsiz qalsanız, artıq orada olacaqsınız.

***

Elm intellektin poeziyası, poeziya isə ürək bağlılığının elmidir.

***

Aşiq olanlar bir-birlərinə min dəfə deyilmiş və təkrar olunmuş sözlərdən başqa deyəcək yeni bir şey tapa bilmirlər. Öpüşlər bu cür mənasız şeyləri yaralara çevirmək üçün icad edilib.

***

Məgər hər şey ətrafımızdakı sükutu necə yozmağımızdan asılı deyil?

***

Musiqi sadəcə sözlər axtaran sevgidir.

***

Öz ölkəsinə yaradıcı şəkildə nifrət etmək hər bir vətənpərvərin borcudur.

***

Həqiqət dillə gətirildiyi anda yox olur.

***

Bizim axtardığımız sülh deyil, mənadır.

***

Bir şəhərin sakinlərdən birini sevəndə, o şəhər bütün bir dünyaya çevrilir.

***

Qocalıq təhqirdir - sillə yemək kimidir.

Rus dilindən tərcümə etdi: Sevinc Mürvətqızı

• Kayli Minouqun mahnıları süni intellektə öyrədilib?
• İstanbulun emosional və sosial mənzərəsini araşdıran fotolar dərc olundu
• Məşhur reperin azadlığa çıxacağı tarix açıqlandı