Azərbaycanın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzində tanınmış uşaq yazıçısı Sevinc Nuruqızının “Humay və sehrli Huma quşu” kitabının özbək dilində nəşrinin təqdimat mərasimi keçirilib.
Azərbaycan Mədəniyyət Mərkəzindən kulis.az-a verilən məlumata görə, mərasimdə Azərbaycan və Özbəkistanın ədəbiyyat və mədəniyyət nümayəndələri, yazıçılar, tərcüməçilər, nəşriyyat və kitabxana əməkdaşları, müəllimlər, uşaq bağçalarının yetirmələri, məktəblilər və uşaq ədəbiyyatına maraq göstərən qonaqlar iştirak ediblər.
Kitab Heydər Əliyev adına Azərbaycan Mədəniyyət Mərkəzi, “Təhsil” və “Çinar” nəşriyyatlarının birgə layihəsi əsasında özbək dilində nəşr olunub. Nəşrin rəyçisi filologiya elmləri doktoru, professor, Milli Məclisin deputatı Elnarə Akimovadır.
Kitabın müəllifi, Azərbaycan yazıçısı Sevinc Nuruqızı çıxışında əsərin ərsəyə gəlməsindən, onun əsas ideyasından və uşaqlara aşıladığı mənəvi dəyərlərdən danışıb. Yazıçı əsərinin özbək dilində nəşr olunmasından məmnunluğunu ifadə edərək, kitabın özbək uşaqları tərəfindən maraqla qarşılanacağına ümidvar olduğunu bildirib.
Tədbir çərçivəsində “Humay və sehrli Huma quşu” kitabı əsasında hazırlanmış qısametrajlı film də nümayiş etdirilib.
Təqdimat mərasiminin bədii hissəsində Azərbaycan Mədəniyyət Mərkəzinin “Xarıbülbül” teatr truppasının üzvləri tərəfindən kitabın mövzusuna uyğun hazırlanmış kiçik teatrlaşdırılmış kompozisiya və əyləncəli səhnələr təqdim olunub. Uşaqların iştirakı ilə müxtəlif interaktiv oyunlar və əyləncə proqramı təşkil edilib.
Bədii proqramda Azərbaycan Mədəniyyət Mərkəzinin “Qarabağ Zəfəri” rəqs ansamblı “Zəngəzur yallısı” rəqsini təqdim edib.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər