Üzeyir Hacıbəylinin 140 illik yubileyi ilə əlaqədar Lənkəran Dövlət Dram Teatrında Üzeyir Hacıbəylinin "Arşın mal alan" operettası əsasında eyniadlı tamaşanın premyerası keçirildi.

Kulis.az xəbər verir ki, yamaşanın quruluşçu rejissoru Azərbaycan Respublikasının Əməkdar Mədəniyyət İşçisi, Dağıstan Respublikasının Əməkdar artisti Laləzar Hüseynova, rejissoru Emil Əskərov, quruluşçu rəssamı Fuad Hüseynov, rəssamı Sevən Həsənli, rejissor köməkçisi Nuranə Nəcəfovadır.

Tamaşada Lənkəran Şəhər icra Hakimiyyəti başçısının müavini - İctimai-siyasi və humanitar məsələlər şöbəsinin müdiri Ülviyyə Əliyeva, Lənkəran-Astara Regional Mədəniyyət İdarəsinin rəisi Bəxtiyar Qılıncov, Sənətşünaslıq doktoru, professor, Türkdilli Xalqların Teatrları Rəhbərlərinin Şurasının sədri İsrafil İsrafilov, Əməkdar İncəsənət Xadimi Ağalar İdrisoğlu, yazıçı-dramaturq, İctimai Xadim Hüseynbala Mirələmov və rayon ictimaiyyəti iştirak edib.

Rollarda:
Şarud Mehdiyeva (Muzey işçisi), Saleh Əzimzadə (Əsgər), Aynur Əhmədova (Cahan xala), Səyad Əliyev (Süleyman),
Teymur Hacızadə (Vəli), Buludxan Buludov (Sultan bəy), Vəfa Hacızadə (Gülçöhrə), Məleykə Cəfərova (Asya), Ayşən Əsədova (Telli), Aysel Babazadə (Qız), Şəbnəm Hüseynova (Qız), Nuranə Nəcəfova (Qız), Fidan Quliyeva (Qız) ifa etdilər.

"Arşın Mal Alan" — Dahi bəstəkar Üzeyir Hacıbəylinin 1913-cü ildə yazdığı musiqili komediyadır. Əsər Azərbaycan milli musiqi mədəniyyətinin şah əsərlərindən biri hesab olunur və həm ölkə daxilində, həm də beynəlxalq səhnələrdə böyük uğurla nümayiş etdirilmişdir.

Tamaşada hadisələr gənc və varlı tacir Əsgərin evlənmək arzusu ətrafında cərəyan edir. O, adət-ənənələrin qoyduğu məhdudiyyətlərə görə qızları tanıya bilmədiyindən özünü arşın mal satan kimi qələmə verir və bu yolla Gülçöhrə adlı bir qıza vurulur. Əsərdə sevgi, azad seçim, ailə dəyərləri və qadının cəmiyyətdəki rolu kimi aktual mövzular yumoristik və musiqili dillə təqdim olunur.

Zəngin milli musiqi nümunələri, rəngarəng obrazlar və cəlbedici süjeti ilə "Arşın mal alan" həm maarifləndirici, həm də əyləndirici bir səhnə əsəri olaraq bu gün də aktual və sevilən tamaşalardandır.

Çox uğurla keçən premyera teatrsevərlər tərəfindən gur alqışlarla qarşılandı.

• Yazıçı oğlu dənizdə, özü isə dəm qazından boğulan akademik – Onu hamıdan fərqləndirən nə idi?
• Şarliz Teron yeni filminin çəkilişlərində xəsarət aldı
• Ələkbər Salahzadənin qızı: "Atamın ölümündən sonra nömrəsindən zəng gəldi, açdım ki..." - Müsahibə