Bu gün tanınmış teatr və kino aktyoru, Xalq artisti Mustafa Mərdanovun doğum gündür. Kulis.az bu münasibətlə İlham Rəhimlinin qələmə aldığı “Bığ” əhvalatını təqdim edir.

Akademik Milli Dram Teatrında rejissor Mehdi Məmmədovun quruluşunda Mehdi Hüseynin “Alov” pyesinin tamaşası oynanırdı. Fasilədə aktyorlar səhnə arxasındakı bufetə qalxıb çay içirlər. Xalq artisti, Bədəl rolunun ifaçısı Mustafa Mərdanov taxma bığ ona mane olduğuna görə yapışqandan qoparıb qoyur yanına. İkinci pərdə başlayır. Onun iştirak etdiyi epizodun vaxtı yaxınlaşanda qalxıb bufetdən çıxır. Gedəndə bığı götürməyi unudur.

Xalq artisti Ağahüseyn Cavadov da onunla bir süfrə arxasında əyləşmişdi. O, Mustafa Mərdanovun bığı yaddan çıxardığını görür, ancaq aktyor həmkarına heç bir söz demir. Ürəyindən keçir ki, səhnəyə bığsız çıxdığına görə rəhbərlik onu danlasın.

İkinci pərdədə belə erizod var: Bədəl, usta Əliş, usta Səməd və başqaları bir yerdə müstəntiq Fərhad Kamalovun yanına gəlirlər. Onlar səhnəyə çıxaçıxda Ağahüseyn Cavadov ləzzətlə və gülə-gülə deyir:

- Mustafa, bığın qaldı bufetdə. İndi səhnəyə belə çıxacaqsan? Lojada tamaşanın gedişini izləyən Mehdi müəllim səni bığsız görüb alnına yağlı bir töhmət yarışdıracaq.

Mustafa Mərdanov özünü itirmir. Baxır Ağahüseyn Cavadovun üzünə və qəfildən onun bağını “qoparıb” tez yarışdırır özünün bığ yerinə.

– Qoy töhmət sənə qismət olsun, – deyib, cəld addımlarla səhnəyə daxil olur.

Ağahüseyn Cavadov çaşbaş qalır. Əvvəlki epizodlarda onu bığlı görmüş tamaşaçılarda gülüş doğuracağından qorxub heç səhnəyə də çıxmır.

Səhərisi teatrın bildiriş və elanlar lövhəsində “Alov” tamaşasının gedişatında səhnə etikasını pozduğuna görə Xalq artisti Ağahüseyn Cavadova şiddətli töhmət verilsin” elanı asılır.

• Məhşərdə cavab verməyə kimin üzü var?
• "Yaslarda yemək verməkdən imtina etmək lazımdır" - İlham Əziz
• İtirilmiş nəslin şairi - O niyə gənc olmaqdan bezmişdi?