20 noyabr dünya ədəbiyyatının dahi ədiblərindən biri Lev Tolstoyun anım günüdür.
Kulis.az bu münasibətlə xarici mediaya istinadən rus yazıçı haqqında diqqətçəkən faktları təqdim edir.
Lev Tolstoyun şəxsi kitabxanasında 39 müxtəlif dildə yazılmış 23 mindən çox kitab vardı. Özü isə bir çox xarici dillərdə sərbəst danışırdı, o, əsl poliqlot idi.
***
Lev Tolstoy böyük ingilis dramaturqu Uilyam Şekspirin yaradıcılığını çox sərt tənqid edir və onun əsərlərinə laqeyd yanaşırdı.
***
Lev Tolstoy Puşkinin uzaq qohumu idi.
Bir dəfə Tolstoy ədəbiyyat üzrə Nobel mükafatına namizəd göstərildi, amma o, təşkilatçılara bildirdi ki, əgər ona mükafat verilsə belə, o, imtina etməyə məcbur olacaq. Nəticədə Nobel Komitəsinin qərarı yenidən nəzərdən keçirildi.
***
Onun 13 övladı vardı, onlardan 5-i müxtəlif səbəblərdən erkən uşaqlıqda vəfat etmişdi.
Tolstoy Çexovun yaradıcılığını çox yüksək qiymətləndirirdi.
***
Həyatı boyu Lev Tolstoy dünyanın müxtəlif ölkələrindən olan oxucularıyla aktiv şəkildə məktublaşıb.
Təxminən 50 yaşından etibarən yazıçı ət yeməyi dayandırdı və ömrünün sonunacan vegetarian oldu.
***
Lev Tolstoyun əl yazısı o qədər anlaşılmaz idi ki, onun arvadı və qızı Aqripina nəşriyyata göndərilməzdən əvvəl onun əlyazmalarını yenidən yazırdılar, çünki redaktorlar yazılanı oxuya bilmirdilər.
***
Bir dəfə Tolstoy az qala Turgenevlə duelə çıxacaqdı, amma xoşbəxtlikdən münaqişə silahsız həll edildi.
***
Lev Tolstoy ömrü boyu təxminən 165 min vərəq əlyazma və 10 mindən çox məktub yazıb.
Yazıçı dəfələrlə etiraf etmişdi ki, it hürüşünə dözə bilmir.
***
Meyvə və giləmeyvə həvəskarı olmasına baxmayaraq, Tolstoy heç vaxt gilas yemirdi – onun dadını bəyənmirdi.
***
Lev Tolstoy ən önəmli əsərlərini 34 yaşında evləndikdən sonra yazıb. Tolstoyun külliyatı 90 cilddən ibarətdir.
***
Zəngin zadəgan olmasına baxmayaraq, yazıçı fiziki əməklə, xüsusilə də öz tarlasında əkin işləri ilə məşğul olurdu.
***
Dostoyevski kimi, Tolstoy da kart və digər mərc oyunlarının həvəskarı idi.
***
Məşhur “Hərb və Sülh” romanını Tolstoy 8 dəfə təkrar yazıb.
Sinodun bəyanatına görə, Lev Tolstoy kilsədən “özbaşına ayrılmışdı”. Onun ateist olduğu və yetkin yaşda dini açıq tənqid etdiyi məlumdur.
***
Sadə və kasıb həyat tərzini təbliğ edən yazıçı, əsərlərinin müəllif hüquqlarından imtina etməyi planlaşdırırdı, amma arvadı sərt şəkildə buna etiraz etmişdi.
Aleksandr Qoldenveyzerin sözlərinə görə, Tolstoy evliliyi dəfn mərasimi ilə müqayisə edirdi.
Sofya Andreyevna ilə evlənəndə yazıçının 34 yaşı, onun isə cəmi 18 yaşı vardı. Toydan əvvəl qraf gələcək həyat yoldaşına öz gündəliklərini oxutdurmuşdu; həmin gündəliklərdə o, müxtəlif qadınlarla olan çoxsaylı əlaqələrini ətraflı təsvir etmişdi. Arvadının sözlərinə görə, o, həmin məzmunu ömrünün sonuna qədər yadda saxladı. Ola bilsin ki, məhz onun bu hərəkəti həyat yoldaşında ömür boyu əzab verən xəstəlik dərəcəsində qısqanclıq hissi yaratdı.
Lev Nikolayeviçin Sofya Andreyevna ilə münasibəti daim dəyişirdi: tam laqeydlikdən izah olunmaz bir mehribanlıq epizodlarına qədər.
Yasnaya Polyanada - həyat yoldaşı ilə toy gecəsindən sonra, ertəsi gün Lev Tolstoy gündəliyinə yalnız iki söz yazmışdı: “O deyil”.
Lev Tolstoy hesab edirdi ki, “hansı işlə məşğul olursa olsun - müəllimlik, tibb, incəsənət - qadının yalnız bir məqsədi var: cinsi sevgi” Xüsusilə yazıçı belə adlandırılan “alim qadınların” azadlıqlarına qarşı qəti mövqe sərgiləyirdi.
Hazırda dünyada Tolstoyun nəslindən təxminən 350 nəfər yaşayır.
***
Yazıçının “zülmə qarşı zorakılıq etmədən müqavimət göstərmək nəzəriyyəsi” məşhur hind siyasi xadimi Mahatma Qandiyə ciddi təsir göstərib.
***
Tolstoyun “Sevastopol hekayələri” onun şəxsi xatirələrinə əsaslanır – gəncliyində o, bu şəhərin müdafiəsində iştirak etmişdi.
***
Lev Tolstoy yaşlananda sadə xalqla yaxınlığını vurğulamaq üçün tez-tez ayaqyalın gəzirdi.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
