Bakı Kitab Mərkəzində xoşbəxtlik və ailə birliyini simvolizə edən Ay təqvimi ilə Çinin Yeni ili olan “Yaz bayramı”na həsr olunmuş Çin poeziya axşamı keçirilib.

Kulis.az xəbər verir ki, tədbiri giriş sözü ilə açan Bakı Kitab Mərkəzinin direktoru Günel Anarqızı qonaqları qarşıdan gələn bayram münasibətilə təbrik edib, Böyük İpək Yolunun ənənələrinə əsaslanan və mədəniyyətlərin qarşılıqlı zənginləşməsinə, iki ölkə xalqları arasında dostluq və qarşılıqlı anlaşmanın möhkəmləndirilməsinə yönəlmiş sürətlə inkişaf edən Azərbaycan-Çin mədəni əlaqələrindən bəhs edib.

Çinin Azərbaycandakı səfirliyinin müvəqqəti işlər vəkili Din Tao gecənin təşkilinə görə Bakı Kitab Mərkəzinə və Azərbaycan Dillər Universitetinin nəzdindəki Konfutsi İnstitutuna təşəkkürünü bildirib, diplomatik missiyanın adından qonaqlara səmimi təbriklərini çatdırıb, onlara bahar sevinci, ailə səadəti və bütün işlərində uğurlar arzulayıb.

Diplomat qeyd edib ki, Bahar bayramı Çin xalqı üçün qədim və ən vacib ənənəvi şənlikdir. Dünyanın müxtəlif yerlərində bu bayramın birgə qeyd edilməsi digər xalqların Çini daha yaxşı tanımasına imkan verir, eyni zamanda, müxtəlif sivilizasiyalar arasında qarşılıqlı bilik mübadiləsini təşviq edir, Qlobal Sivilizasiya Təşəbbüsünün praktik təcəssümünə çevrilir.

Çinin Bahar bayramı ilə Azərbaycanın Novruz bayramı arasında mədəni oxşarlıqlar mövcuddur. Hər iki festival ailə birliyini əsas dəyər kimi qəbul edir, yazın gəlişini və ümidin yenidən doğulmasını qeyd edir və xalqlarımızın təbiətə ehtiramını, ailə bağlarına sədaqətini və xoşbəxt həyat arzularını ifadə edir. Məsafələri və mədəni fərqləri aşan bu emosional yaxınlıq Çin və Azərbaycan arasında humanitar əməkdaşlıq üçün möhkəm və səmimi təməl yaradır.

“2025-ci il Çin-Azərbaycan münasibətləri üçün məhsuldar dövr olub, keçmiş ənənələri davam etdirib və zəngin nəticələr verib. Çin Xalq Respublikasının Sədri Si Cinpinin və Azərbaycan Respublikasının Prezidenti İlham Əliyevin strateji rəhbərliyi altında iki ölkə hərtərəfli strateji tərəfdaşlıq münasibətləri qurub və əlaqələr yüksəkkeyfiyyətli və çoxşaxəli inkişafın yeni mərhələsinə qədəm qoyub. Qarşılıqlı siyasi etimad daha da möhkəmlənib, iqtisadi-ticari əməkdaşlıq genişlənib, praktik əməkdaşlıqda mühüm nailiyyətlər əldə edilib, humanitar münasibətlər dinamik şəkildə inkişaf edib və ənənəvi dostluq yeni dövrün mahiyyəti ilə zənginləşib”, - deyə Çin diplomatı bildirib.

Konfutsi İnstitutunun direktoru Rafiq Abbasov bu institutun mədəni diplomatiyadakı rolundan danışaraq qeyd edib ki, ənənəvi Çin bayramları millətlərarası mədəni ünsiyyətin inkişafı üçün böyük əhəmiyyət daşıyır.

ADU-nun Çin dili müəllimi Kəmalə Məmmədova UNESCO-nun Qeyri-Maddi Mədəni İrs Siyahısına daxil edilmiş Bahar bayramının tarixindən, ilin rəmzi olan qırmızı od atından və bayramla əlaqəli adət-ənənələrdən, əfsanələrdən və rəvayətlərdən danışıb. O, həmçinin klassik Çin poeziyasının dərin fəlsəfə, obrazlar, simvolizm və özünəməxsus musiqililiklə dolu olduğunu qeyd edib.

Tədbirdə Konfutsi İnstitutunun müəllim və tələbələri Çin Yeni ilinə həsr olunmuş, təbiətin yenilənməsini, soyuq havaların arxada qalmasını və gavalı çiçəklərini tərənnüm edən şeirlər oxuyublar. Bu poeziya nümunələri yeni həyat, firavanlıq, sevinc və ailə toplantıları mövzuları ilə dolu idi. Onlar, həmçinin ənənəvi Çin operasından “Sehrbaz” səhnəsini, Çin fleytası üçün melodiyanı, “hulusi” (“Ay işığında bambuk”), “Səni sevirəm söylə”, “Şaftalı çiçəkləri” və “Ana və körpə” kimi folklor və müasir mahnıları, eləcə də “Qarlı torpaq” və “Çiçəkaçma” kimi rəqsləri ifa ediblər. Tədbirdə Çin xəttatlığı, ağac oyması, lak rəsmləri və Çin oyma möhürlərinin hazırlanmasına həsr olunmuş eksponatlar nümayiş etdirilib. Qonaqlar, həmçinin ənənəvi çay mərasimində iştirak edib və məşhur Çin çay növlərinin dadına baxıblar.

• Mütəfəkkir baxışlarının fonunda "Xəmsə" səhifələri - "Nizami Gəncəvinin portreti"
• Türkiyəli məşhur müğənni vəfat etdi
• Türkiyədə uzunmetrajlı filmlərin istehsalına ayrılan dəstək 42 faiz artırıldı