15 sentyabr 2025-ci il tarixində Türk Mədəniyyəti və İrsi Fondunun mərkəzi qərargahında Fondun əməkdaşı, Azərbaycan Yazıçılar Birliyinin Gənclər Şurasının sədri, gənc şair Fərid Hüseynin yaradıcılığına həsr olunmuş ədəbi-bədii konsert və onun dahi Nizami Gəncəvi yaradıcılığı haqqında qələmə aldığı “Aqibətnamə” kitabının təqdimat mərasimi keçirilib.

Kulis.az xəbər verir ki, tədbirdə Qırğızıstanın Azərbaycandakı fövqəladə və səlahiyyətli səfiri Maksat Mamıtkanov, TÜRKPA-nın baş katibi Mehmet Süreyya Er, Azərbaycanda akkreditə olunmuş diplomatik korpus nümayəndələri, həmçinin dövlət xadimləri, elm adamları və ədəbiyyat dünyasının nümayəndələri və media təmsilçiləri iştirak ediblər.

Tədbirin açılışında Türk Mədəniyyəti və İrsi Fondunun prezidenti Aktotı Raimkulova çıxış edərək, Fondun missiyasının yalnız mədəni irsin qorunması ilə məhdudlaşmadığını, həm də ümumtürk dəyərlərinin gələcək nəsillərə ötürülməsi və yeni yaradıcı qüvvələrin üzə çıxarılmasına da yer verildiyini bildirib. Onun sözlərinə görə, Nizami Gəncəvi kimi dahilərin əsərləri bütün türk dünyasının ortaq sərvətidir və bu irs gənc nəslin ilham qaynağına çevrilməlidir. Xanım A. Raimkulova Fondun qapılarının həmişə gənc istedadlara açıq olduğunu, onların yaradıcılığının türk xalqlarının mədəni birliyini daha da gücləndirdiyini xüsusi qeyd edərək, Fərid Hüseyni yeni kitabı münasibətilə təbrik edib, ona gələcək peşəkar fəaliyyətində yeni uğurlar arzulayıb.

Səlim Babullaoğlunun aparıcılığı ilə təqdim olunan zəngin ədəbi-bədii gecədə çıxış edən Azərbaycanda Atatürk Mərkəzinin direktoru, akademik Nizami Cəfərov, filologiya elmləri doktoru, nizamişünas alim, “Aqibətnamə” kitabının redaktoru Zəhra Allahverdiyeva, professor Rüstəm Kamal, Nizami Gəncəvi adına Azərbaycan Ədəbiyyatı İnsitutunun direktoru, filologiya üzrə fəlsəfə doktoru Mehman Həsənov, gənc şair Qismət nəşrin ədəbi-fəlsəfi məziyyətlərindən söz açaraq gənc müəllifin yaradıcılığına yüksək qiymətləndiriblər.

Tədbir boyu Fərid Hüseynin şeirləri tanınmış qiraətçilər Tural Əhməd, Günel Həmidova, Sabirə Abdullayevanın ifalarında səslənib, gənc şairin şeirlərinə bəstələnən mahnılar Elgiz Əliyev, Aişən Mehdiyeva, Yaqut Xəlilzadənin ifalarında dinlənilib. Xanəndələri tarda Səxavət Məmmədov, kamançada Toğrul Qasımov, pianoda Ağarəhim Salah müşayiət ediblər.

Qeyd edək ki, tədbirin sonunda Fərid Hüseyn oxucular üçün kitablarını imzalayıb və xatirə fotosu çəkilib.

• Metyu Perrinin ölüm işində şok detallar - Köməkçisi sübutları belə məhv edib
• "Həmişə dilimin bəlasına düşürəm..." - Saramaqonu niyə tarixi həqiqətləri lağa qoymaqda ittiham edirdilər?
• Mollalıqdan aktyorluğa - Möhsün Sənaninin qəribə taleyi