Gəncə Dövlət Dram Teatrının aktyoru, əməkdar artist Əlican Əzizov vəfat edib.

Kulis.az xəbər verir ki, bu barədə aktyorun əsənət yoldaşları məlumat verib.

Qeyd edək ki, Əlican Süleyman oğlu Əzizov 1975-ci ildə Azərbaycan Dövlət İncəsənət Universitetinin "Dram və kino aktyoru" fakültəsini bitirib, 1975-1996-cı illərdə Gəncə Dövlət Dram teatrında fəaliyyət göstərib.

1996-cı ildən Gəncə Dövlət Nizami Poeziya Teatrında yaradıcılıq fəaliyyətini davam etdirib və 2000-ci ildə Respublikanın Əməkdar Artisti fəxri adına layiq görülüb.

1978-ci ildə o, "Yaradıcı gənclərə baxış" müsabiqəsinin qalibi, 1985-ci ildə Respublikada "Ən yaxşı kişi rolunun ifaçısı" olub.

Ə.Əzizov "Komsomol" poemasında Bəxtiyar, "Vaqif"də Vidadi, "Aydın"da Dövlət bəy, "Almaz"da Fuad, "1905-ci ildə" Volodin, "Dairəni genişləndirin" əsərində Sergey Uqolkov və s. obrazlar yaradıb.

Gəncə Dövlət Nizami Poeziya Teatrında fəaliyyəti dövründə, N.Gəncəvinin əsərləri əsasında hazırlanmış tamaşalarda İsgəndər, Bəhram, Çoban, Fərhad obrazlarını yaradıb, "Xeyir və Şər", "Gül və Zəhər" əsərlərinin quruluşçu rejissoru olub. Bununla yanaşı o, A.Murovdağlının "Alın yazısı", M.Alimin "Gül və Zəhər", A.Babayevin "Memarın məhəbbəti", Z.Xəlilin "Gəncə qartalı" əsərlərində quruluşçu rejissor olub.

Ə. Əzizov Azərbaycanfilmin istehsalı olan "Süd dişinin ağrısı", "Dairə", "Şahid qız" filmlərində Kərimin atası, Arif və kapitan Mikayılov rollarını ifa edib.

M.Kərimin "Odu atma Prometey" əsərində Əcəmşah roluna görə keçmiş SSRİ Mədəniyyət Nazirliyinin mükafatını alıb.

2006-cı ildə o, Prezident mükafatına layiq görülüb.

• “Aktrisa heç bir yerini şişirtməli deyil” – Gülşad Baxşıyeva ilə müsahibə
• Milli Teatr Günü münasibətilə tədbir keçirildi
• Medianın İnkişafı Agentliyi bəyanat yaydı