“Hədəf Nəşrləri” 2020-ci ildən yeni layihələrlə işləmək məqsədi ilə dəyişikliklərə getmək qərarı verib.

Nəşriyyatdan Kulis.az-a verilən məlumata görə, Şəmil Sadiqin qərarı ilə əvvəllər nəşriyyatda baş redaktor çalışmış gənc yazıçı Səbuhi Şahmursoy icraçı direktor təyin edilib.

Səbuhi Şahmursoy mətbuatda yayılmış bəzi dezinformasiyalara aydınlıq gətirib: “Hədəf Nəşrləri” 10 ildir ki, kitabçılıqla məşğul olur və yetərincə ciddi nəşriyyatdır. Rəhbərliyi mənə həvalə olunan nəşriyyat təkcə metodiki ədəbiyyat nəşr etməklə kifayətlənməyib, əvvəlki kitab silsilələrini davam etdirəcək. Sadəcə nəşriyyatın fəaliyyətində əvvəllər rast gəlinən problemləri aradan qaldırmağa yönələcəyik. Bunlar arasında müəllif hüquqları məsələsindəki qərarlılıq, kitabların poliqrafik keyfiyyətləri, qiymət siyasəti, əsər seçimi məsələləri də var. Ümumiyyətlə, yerli kitab bazarına uyğun addım atmaqla yanaşı, nəşriyyatın yeni ildəki ilk layihəsi istər klassik, istərsə də müasir Azərbaycan ədəbiyyatı nümunələrini rus dilində çap etmək olacaq. Bununla da Rusiya və Orta Asiya bazarına çıxmağı planlaşdırırıq".

S. Şahmursoy əlavə edib:

"Hədəf Şirkətlər Qrupunun qarşısına qoyduğu hədəf bütün sahələrdə dünya markası olmaqdır. Bunun üçün yeni ildən “Hədəf Nəşrləri”ndə yeni ştat da olacaq – müəllif hüquqlarının alışı və satışı ilə məşğul olan agent. Bununla da, istər nəşriyyatın layihələrinin, istərsə də azərbaycanlı müəlliflərin əsərlərinin xarici nəşriyyatlara satışını təşkil edəcəyik”.

• "Heç vaxt insana olan inamımı itirməmişəm..." - Pablo Nerudanın Nobel nitqi
• "Rənglərin içində yaşayan adam..." - Səttar Bəhlulzadə niyə rəsmlərini satmaq istəmirdi?
• YUĞ Teatrı Kimera Beynəlxalq İncəsənət və Mədəniyyət Festivalında