Şəkillərdə yaxşı düşür uşaqlıq – LAYİHƏ
Kulis.az “Şəkillərdə yaxşı düşür uşaqlıq” layihəsində məşhurların uşaqlıq şəkilləri və bununla bağlı xatirələrini təqdim edir.
Zamin Hacının uşaqlıq fotosu
Bu şəkil Füzuli rayonu, Aşağı Seyidəhmədli kəndində çəkilib. 1979-cu ildir, 1-ci sinfə gedirəm. Hansısa şeiri deyirəm, ancaq şeir yadımda qalmayıb. Böyük ehtimalla “Lenin baba” mövzusunda, ya da “oktyabryat”a aid bir şeirdir. İndiki uşaqlar bilməz, o vaxt biz əvvəl oktyabryat, sonra pioner, sonra komsomol olurduq. Axırda partiya üzvü gəlirdi. Orta məktəbi bitirənə qədər kəndin, məktəbin bütün tədbirlərində şeir dedim, çıxış elədim. Nümunəvi şagird sayılırdım. Hətta institutun 1-ci kursunda tətilə gedəndə əlimdə siqareti görən bir neçə kəndlimiz indiki dildə desək, şoka düşmüşdü.
Bu şəkildə yanımda duranlar Bahadur müəllim – məktəbin direktoru və Humay müəllimdir. Arxada uşaqlar oturan yer bizim məktəb stadionunun təpəliyidir. Orda keçən günlərimdən, oynadığım futboldan ötrü burnumun ucu göynəyir. Ancaq indi bunların hamısı məhv edilib – erməni işğalı altındadır.
Bahadur müəllim məni 2-ci sinifdə milislə qorxudub. Bir qızın başını yarmışdım, dedi, indi milis çağıracam, səni it maşınıyla aparacaqlar. Zülüm-zülüm ağladım, yalandan telefonun dəstəyini götürdü, dedi ağıllanıb, ta gəlməyin. Heç yadımdan çıxmır. Uşaqlıq travması kimi bir şeydir.
