Dekabrın 22-də Bakı şəhəri 3 nömrəli Uşaq-Gənclər İnkişaf Mərkəzi və Bakı Kitab Mərkəzinin birgə təşkilatçılığı ilə 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə “Yeni il möcüzəsi” adlı şənlik təşkil olunub.
Kulis.az xəbər verir ki, tədbirə 2 nömrəli ümumi təyinatlı internat tipli ümumtəhsil məktəbinin sakinləri iştirak ediblər.
Bildirilib ki, Bakı Kitab Mərkəzinin əməkdaşları tərəfindən uşaqlar üçün qısa tanıtım ekskursiyası keçirilib. Daha sonra “Regional İnkişaf” İctimai Birliyi və 3 nömrəli Uşaq-Gənclər İnkişaf Mərkəzinin təşəbbüsü ilə uşaqlar üçün maarifləndirici ustad dərsi, həmçinin “Oxu saatı” təşkil olunub.
Tədbirin davamında 3 nömrəli Uşaq-Gənclər İnkişaf Mərkəzinin “Teatr sənəti” dərnəyinin üzvləri nağıl qəhrəmanlarının obrazlarında maraqlı və əyləncəli konsert proqramı ilə çıxış ediblər. “Vokal” dərnəyinin üzvləri mahnılar səsləndirib, “Milli rəqs” və “İdman rəqsi” dərnəklərinin istedadlı üzvləri isə Yeni il mövzusunda cizgi film və nağıl qəhrəmanlarının obrazlarını canlandıraraq gözəl rəqs nümunələri nümayiş etdiriblər.
Tədbir çərçivəsində Mərkəzin “Təsviri sənət və dizayn” dərnəyinin istedadlı üzvlərinin Yeni il mövzusunda hazırladıqları rəsm işləri sərgilənib.
Sonda balaca qonaqlara Bakı Kitab Mərkəzi, 3 nömrəli Uşaq-Gənclər İnkişaf Mərkəzi və “TAJ” MMC tərəfindən hədiyyələr təqdim olunub.
