Oktyabrın 30-da “Azərbaycan Jurnalistlər Şəbəkəsi” İctimai Birliyinin istehsalı və Qeyri-Hökumət Təşkilatlarına Dövlət Dəstəyi Agentliyinin dəstəyi ilə ərsəyə gələn “Yaradan” sənədli filminin təqdimatı keçirilib.
Kulis.az xəbər verir ki, Vətən müharibəsində qazanılmış tarixi Zəfərin 5 illiyinə həsr olunan ekran əsəri Qarabağda və Şərqi Zəngəzurda aparılan bərpa və yenidənqurma proseslərini, doğma torpaqlarına qayıdan keçmiş məcburi köçkünlərin həyat hekayələrini və xalqımızın dirçəliş ruhunu əks etdirir.
Təqdimat mərasimində çıxış edən “Azərbaycan Jurnalistlər Şəbəkəsi” İctimai Birliyinin sədri və filmin ssenari müəllifi Ayaz Mirzəyev bildirib ki, “Yaradan” filmi yalnız faktları və hadisələri deyil, həmçinin Azərbaycan vətəndaşının mənəvi dirçəlişini göstərir.
“Filmdə izləyəcəyiniz insanların əksəriyyəti yaradıcı şəxslərdir. Biz onların taleləri və düşüncələri vasitəsilə işğaldan əvvəlki dövrü, işğal illərini və azadlıqdan sonrakı bərpa mərhələsini təqdim edirik”, – deyə A.Mirzəyev vurğulayıb.
Qeyd edək ki, çıxışdan sonra qonaqlar sənədli filmə tamaşa eləyiblər.
