Beynəlxalq Muğam Mərkəzində (BMM) Xalq artisti, tanınmış tarzən, professor Vamiq Məmmədəliyevin 80 illik yubileyi münasibətilə tədbir keçirilib.
Kulis.az xəbər verir ki, tədbirdə mədəniyyət xadimləri, musiqiçilər, ziyalılar və sənətsevərlər iştirak ediblər.
Yubiley gecəsində mədəniyyət nazirinin müavini, Xalq artisti Murad Hüseynov nazirliyin adından yubilyara ünvanlanan təbrik məktubunu tədbir iştirakçılarının diqqətinə çatdırıb.
Daha sonra BMM-in direktoru, Əməkdar artist, Özbəkistanın Mədəniyyət səfiri, sənətşünaslıq üzrə fəlsəfə doktoru Sahib Paşazadə Vamiq Məmmədəliyevi təbrik edərək ona möhkəm cansağlığı, yeni yaradıcılıq uğurları arzulayıb. Bildirib ki, ömrünün böyük bir hissəsini Azərbaycan musiqi mədəniyyətinin, xüsusilə də muğam sənətinin qorunmasına, inkişafına və təbliğinə həsr etmiş Vamiq Məmmədəliyev zəngin yaradıcılıq yolu keçib. Onun pedaqoji və elmi fəaliyyəti sayəsində yetişdirdiyi çoxsaylı tar ifaçıları milli musiqi məktəbimizin bu gününü və sabahını formalaşdıran dəyərli nümayəndələrə çevriliblər.
Milli Məclisin ictimai birliklər və dini qurumlar komitəsinin sədri Fazil Mustafa, Azərbaycan Dövlət Mədəniyyət və İncəsənət Universitetinin rektoru Ceyran Mahmudova, Azərbaycan Milli Konservatoriyasının rektoru Kamilə Dadaş-zadə, Xalq rəssamı Arif Hüseyn, Əməkdar artist Əyyub Quliyev, publisist Əkrəm Qaflanoğlu çıxış edərək tarzənin Azərbaycan musiqi mədəniyyətinin inkişafındakı xidmətlərindən, gənc nəslin yetişdirilməsi istiqamətində gördüyü işlərdən və pedaqoji fəaliyyətindən söz açıb, ona ən xoş arzularını çatdırıblar.
Qeyd edilib ki, görkəmli tarzən tar alətinin ecazkar imkanlarını yüksək peşəkarlıqla nümayiş etdirərək Azərbaycan muğamını ölkəmizdə və onun hüdudlarından kənarda layiqincə tanıdıb. Dünyanın bir çox ölkələrində görkəmli muğam ifaçıları ilə birlikdə qastrol səfərlərində milli musiqimizi layiqincə təmsil edib. Vamiq Məmmədəliyevin Qızıl Fonda daxil edilmiş ifaları, görkəmli xanəndələrlə yaratdığı sənət nümunələri milli musiqi irsimizin ən qiymətli səhifələri sırasında xüsusi yer tutur. Tarzənin sənətə və müəllimlik missiyasına sonsuz sədaqəti, gənc nəslin milli-mənəvi dəyərlər ruhunda formalaşmasına verdiyi töhfələr hər zaman böyük ehtiramla qarşılanır.
Yubiley gecəsində tanınmış xanəndələr və tarzənlər muğam və xalq mahnılarından ibarət proqramla çıxış ediblər. Xanəndələri Əməkdar artist Əliağa Sədiyevin rəhbərliyi ilə “Xarıbülbül” muğam qrupu müşayiət edib.
