Amerikalı R&B ulduzu, üçqat "Qremmi" mükafatçısı Viktoriya Mone üç illik fasilədən sonra musiqi dünyasına qayıdıb.
Kulis.az xəbər verir ki, müğənni 22 trekdən ibarət "Frequency of Love" adlı yeni studiya albomunu dinləyicilərin ixtiyarına verəcək.
Bu layihə sənətçinin 2023-cü ildə ona böyük şöhrət və "Qremmi" qazandıran "Jaguar II" albomunun davamı hesab olunur.
Mone üç illik fasiləsinin "qayıdış" adlandırılmasından qətiyyən narahat olmadığını bildirib. O, musiqidə tələskənliyi tənqid edərək deyib:
"Növbəti albomu hazırlamaq üçün vaxt ayırmaq normal qəbul edilməlidir. Bilirəm ki, hər şeyi dərhal əldə etmək istədiyimiz bir dünyada yaşayırıq. İnsanların məndən daha çox musiqi istəməsi və ya '"Ondan ötrü çox darıxdım" deməsi məni sevindirir. Buna qayıdış deməkləri də xoşdur, çünki bu, yoxluğumun fərqinə varıldıqları bir zaman boşluğunun olduğunu göstərir".
Ulduzlar keçidi və 90-cı illərin nostalgiyası
İcraçı prodüserliyini "Camper"in etdiyi "Frequency of Love" albomu dinləyiciləri sadəcə romantikanın hüdudlarından kənara çıxaran səs səyahətinə aparır. Albomda "Reach Out" (haus musiqisi ritmində), "Juicy" (yaxta-R&B üslubunda) və artıq "Billboard"un R&B çartlarında 1-ci pilləyə yüksələn "Let Me" kimi hit sinqllar yer alıb. Layihənin ən diqqətçəkən tərəflərindən biri isə qonaq sənətçilərin siyahısıdır: Bruno Mars, SZA, Brayson Tiller, Leon Tomas və Xloya Beyli kimi musiqi nəhəngləri albomda Mone ilə birgə oxuyurlar.
Başlanğıcda sırf "yaxta-R&B" albomu yaratmağı düşünən sənətçi sonradan mövzuları genişləndirib:
"Mən sevgiyə çox, lap çox bağlıyam... Albom qızım üçün olan sevgimdən tutmuş, dünya üçün arzuladığım sevgiyə qədər bir çox mövzunu əhatə edir. Mahnıların çoxu görüşlər (dating) zamanı keçirdiyim hisslərin əks-sədasıdır".
Albom 90-cı illərin klassik R&B nəfəsini də özündə daşıyır. Brendinin "Almost Doesn't Count" mahnısına istinad edən "Almost" treki, Kenni Lattimorun romantik balladasının yenidən işlənməsi olan "For You" və Monenin hələ uşaqkən nənəsi ilə birgə izlədiyi Holli Berri filmindən ilhamlanaraq ərsəyə gətirdiyi "Care for Somebody" interlüdü keçmişlə müasirliyi ustalıqla birləşdirir.
Yaradıcılıq prosesində Viktoriya Mone pop kralı Maykl Ceksonun "Off the Wall" albomundan "Thriller"ə qədər keçdiyi musiqi inkişafından ilham aldığını gizlətmir. O, tarixin ən məhsuldar sənətçilərindən biri ilə müqayisə olunmaqdan çəkinsə də, məhz Ceksondakı "riskə getmək" sənətkarlığını öz albomuna tətbiq etməyə çalışıb:
"Mən "Thriller" yaratmamışam," – deyə Mone təvazökarlıqla vurğulayır:
"Mən sadəcə o düşüncə tərzi ilə nə edə bilərəmsə, onun öz versiyamı yaratdım" .
Ülvi Bahadır
Ana səhifə
Reels
Yazarlar
Xəbərlər