Bu gün avstriyalı pianoçu, virtuoz musiqiçi Mariya Anna Motsartın doğum günüdür.
Kulis.az onun haqqında materialı təqdim edir.
Tarixdə "Nannerl" ləqəbi ilə tanınan Mariya Anna Motsart, sadəcə Volfqanq Motsartın bacısı deyil, uşaqlıq illərində onunla eyni dərəcədə — hətta bəzi mənbələrə görə ondan da virtuoz dahi bir musiqiçi idi.
Nannerl 7 yaşında klavesin çalmağa başladı. O dövrdə balaca Volfqanq hələ 3 yaşında idi və bacısının klavesində çıxardığı səsləri heyranlıqla izləyirdi. Volfqanqın musiqiyə həvəs göstərməsinin və ilk addımlarını atmasının əsas səbəbi bacısına olan heyranlığı idi.
Ataları Leopold Motsart hər iki uşağın fövqəladə istedadını kəşf etdikdən sonra onları Avropa turuna çıxardı.
Nannerl və Volfqanq Paris, London, Vyana kimi böyük şəhərlərdə krallar və kübar cəmiyyət qarşısında çıxış edirdilər. O dövrün mətbuatı və tənqidçiləri Nannerli "Avropanın ən istedadlı klavesin ifaçılarından biri" adlandırırdılar.
Nannerlin musiqi karyerası 18 yaşına çatanda anidən dayandı. XVIII əsr Avropasının cəmiyyət qaydalarına görə, yetkin bir qadının səhnəyə çıxıb pul qazanması "əxlaqi baxımdan uyğun" sayılmırdı.
Atası Leopold yalnız Volfqanqın turlarını davam etdirdi. Nannerl isə Zalsburqda qaldı, ərə getməsi üçün evdə gözlədildi və musiqi dərsləri verməyə başladı.
Volfqanq Motsart bacısına yazdığı məktublarda onun bəstələdiyi musiqiləri heyranlıqla tərifləyirdi. Bir məktubunda yazırdı:
"Əziz bacım, bəstələdiyin mahnını oxuyanda donub qaldım! Mükəmməldir... Xahiş edirəm daha çox bəstələ!"
Təəssüf ki, Nannerlin bəstələdiyi əsərlərin heç biri günümüzə çatmayıb. Çox guman ki, dövrün şərtlərinə görə öz əsərlərini çap etdirə bilməyib və ya onlar zamanla itib.
Volfqanq və Nannerl uşaqlıqda çox yaxın idilər. Onlar turlar zamanı darıxmamaq üçün "Rəngli Krallıq"adlandırdıqları uydurma bir nağıl dünyası və yalnız özlərinin başa düşdüyü gizli bir dil uydurmuşdular. Məktublaşmalarında tez-tez bu dildən və zarafatlardan istifadə edirdilər.
Nannerl atasının israrı ilə hakim İohann Baptist fon Bertold ilə ailə qurdu.
Həyat yoldaşı vəfat etdikdən sonra Zalsburqa qayıtdı və ömrünün sonuna qədər musiqi müəllimliyi etdi.
_1785394142.jpg)
Qardaşı Volfqanqın erkən ölümündən sonra onun xatirəsinin və əlyazmalarının qorunub saxlanmasında böyük rol oynadı.
Nannerlin gündəlikləri balaca Volfqanqın təkcə dahi deyil, həm də çox mehriban və oynaq bir uşaq olduğunu göstərən ən dəyərli mənbədir.
O, qardaşının musiqi yazarkən belə zarafatlar etdiyini və ailəsini güldürməkdən böyük zövq aldığını xüsusi olaraq qeyd edirdi.
Qeydlərində Volfqanqın möhtəşəm yaddaşını vurğulayaraq, onun bir dəfə eşitdiyi mürəkkəb əsərləri belə dərhal səhvsiz təkrar çala bildiyini yazmışdı.
Nannerl bu gündəliklər sayəsində dünya şöhrətli bəstəkarın pərdəarxası insani tərəflərini və uşaqlıq illərinin səmimi mühitini gələcək nəsillərə çatdırdı.
Haydn daxil olmaqla bir çox bəstəkar ona həmişə böyük hörmətlə yanaşırdı.
