Qara dəniz musiqisinin unudulmaz simalarından biri olan Kazım Koyuncunun həyatı "Kazım Koyuncu: Yarım Kalan" filmi ilə ilk dəfə ekranlaşdırılır.
Kulis.az xəbər verir ki, ekran işinin çəkilişlərinə bu ilin avqust ayında İstanbul və Şərqi Qara dəniz bölgəsində başlanılması planlaşdırılır.
Filmin 1 yanvar 2027-ci ildə yayımlanması nəzərdə tutulub.
Geniş aktyor heyəti ilə diqqət çəkən layihənin ən böyük sürprizi məşhur komediyaçı Cem Yılmaz olub. O, filmdə Kazım Koyuncunun atası Cavit obrazını canlandıracaq.
Rejissor kürsüsündə Özcan Alperin əyləşdiyi filmin ssenarisini Özcan Alper, Murat Uyurkulak və Erman Bostanla birlikdə qələmə alıb. Ekran işində baş rolu — Kazım Koyuncunu gənc aktyor Cem Yiğit Üzümoğlu canlandıracaq. Üzümoğlunun obraz makiyajı və dizaynı üçün "John Wick: Chapter 4" və "Tár" kimi beynəlxalq layihələrdən tanınan dünyaca məşhur makiyaj rəssamı Yekaterina Ortel ilə razılıq əldə edilib.
Ulduz heyətinə Ayça Bingöl (Kazımın anası Hüsniye), Şifanur Gül (Gönül), Bige Önal (Türkan), Aslıhan Kapanşahin (Ceren), Baran Bölükbaşı, İlker Sami Kılıç və Onur Durmaz kimi sənətçilər daxildir.
Filmdə Koyuncunun uşaqlıq illərindən başlayaraq ailəsi, dostluqları, təbiətlə qurduğu bağ, siyasi baxışları və musiqi səyahəti əhatə olunacaq. Layihənin prodüserləri Soner Alper və Deniz Tosundur. Filmin ilk tizerinin yaxın aylarda yayımlanması gözlənilir.
