Azərbaycan Respublikasının Kino Agentliyi və Cəfər Cabbarlı adına “Azərbaycanfilm” Kinostudiyası Azərbaycan Kinosu Günü münasibətilə xüsusi kino axşamı təqdim edəcək.
Kulis.az xəbər verir ki, tədbir avqustun 1-də Cəfər Cabbarlı adına “Azərbaycanfilm” Kinostudiyasında keçiriləcək.
Bakı şəhərinin mədəni xəritəsinin əsas cəlbedici nöqtələrindən və milli kino tariximizin formalaşdığı əsas məkanlardan biri olan kinostudiya bu dəfə tamaşaçılara kino sənəti ilə yalnız ekran vasitəsilə deyil, filmlərin yaradıldığı real mühitdə tanış olmaq imkanı yaradacaq. Bir axşamda Azərbaycan kinosunun keçmişi, bu günü, real çəkiliş prosesi, vizual sənət və musiqi eyni məkanda bir araya gələcək.
Zəngin proqram çərçivəsində qonaqlar kinostudiya ərazisində təşkil olunacaq turda iştirak edə, real çəkiliş prosesini yerində izləyə və xüsusi divar rəsminin təqdimatına şahidlik edə biləcəklər. Axşam boyunca sevilən “Bəyin oğurlanması” və “Gün keçdi” filmlərinin açıq havada nümayişi təşkil olunacaq.
Tədbirdə iştirak ödənişsizdir, lakin yerlər məhdud olduğuna görə əvvəlcədən qeydiyyatdan keçmək mütləqdir.
