Kino tariximizin 4 cildlik salnaməsi çap edilib.

Kulis.az xəbər verir ki, Azərbaycan kinosu tarixində ilk dəfə 120 illik kino tariximizin 4 cildlik salnaməsi çap edilib. Nəriman Əbdülrəhmanlının müəllifi olduğu kitabı Azərbaycan Kinematoqrafçılar İttifaqı çap edib.

Layihənin rəhbəri Rüstəm İbrahimbəyov salnamə haqqında fikirlərini bildirib: “Nəriman Əbdülrəhmanlının fundamental dördcildlik tədqiqatında Azərbaycan kinosunun yarandığı vaxtdan bu günə formalaşma prosesini izləmək mümkündür. Araşdırmanın faktoloji mənada zəngin olan mətni quruluş cəhətdən maraqlı dramaturgiyaya malikdir, tarixi prosesi müxtəlif rakurslardan – xronoloji, janr, tematik, konseptual və s. – nəzərdən keçirməyə imkan verir. O da vacibdir ki, kinomuzun tarixi, ayrı-ayrı dövrlərdə istehsal edilən filmlərin sayına, başlıcası isə ekran əsərlərinin məzmununa və bədii təcəssümünə əhəmiyyətli dərəcədə təsir göstərən genişmiqyaslı ictimai-siyasi proseslər kontekstində araşdırılıb”.

Azərbaycan Kinematoqrafçılar İttifaqının katibliyindən bildiriblər ki, dördcildlik “Azərbaycan kino sənəti tarixi” tədqiqatı Azərbaycan Demokratik Respublikasının 100, Azərbaycan kinosunun 120 illik yubileylərinə həsr olunub. Kino dərsliyi, kino tarixi, kinoşünaslıq nəşrləri sahəsində boşluğu doldurmağı vacib hesab edərək bu sahədə nəşrlər davam edəcək.

Xatırladaq ki, bu kitab İttifaqın sayca ikinci nəşridir. İlk nəşr rejissor Həsən Seyidbəylinin 100 illik yubileyi ilə əlaqədar çap olunan "Həsən Seyidbəyli: şəxsiyyət və yaradıcı" kitabıdır.

Hər iki nəşrin üz qabığının müəllifi Rəsul Həsənidir.

• Məhəmməd Peyğəmbərin adı yazılan qədim daş tapıldı
• Təbiətlə ilahi dünya arasında mistik körpü - Serafin Luinin "Həyat ağacı"
• Seyid Cəfər Pi­şə­və­rinin müəmmalı ölümü... - Qərb mətbuatı onun haqqında nə yazırdı?