Yandır məktublarımı, külü üfür üzümə

Yandır məktublarımı, külü üfür üzümə
28 oktyabr 2013
# 11:15

Kulis.az şair Mətləb Ağanın şeirlərini təqdim edir.

***

Sən də yaman gecikdin;

durub payızda gəldin...

kimin əlində soldun?

solub, payızda gəldin...

mənəmi həsr etmisən

üzündəki qırışı?..

hardaydın yaşılında?

sənə payız yaraşır....

şükür, məni tanıdın,

gördün, günün birində...

...sən də bir vaxt varıydın,

öldün günün birində...

...bəlkə qışdan danışaq,

payız da çoxdur sənə...

...əlimdən tut, bilirəm,

yaman soyuqdur sənə...

2013

***

Nə daha aç qapımı,

nə bir də gül üzümə...

yandır məktublarımı,

külü üfür üzümə.

yandır şeirlərimi,

qızın bir ocaq kimi...

sevindir mən dəlini,

sonra da vur üzümə...

daha məni tanıma,

neyləyim sən xanıma...

vur ölüm,

bir gün

amma

güzgüdə dur üzünə...

1994

***

Çox dəyişib bu şəhər,

yolu, parkı, dənizi...

görən, sonuncu dəfə

kim görüb burda bizi?..

...hardasan indi görən,

neyləmisən özünü?

bilirəm, güzgülərdən

gizlədirsən üzünü...

çəkilib bir tərəfdə

özünçün qocalırsan...

hər gecə ağlayırsan,

və hər gün qocalırsan...

-”...zəng də çatmırdı sənə,

harda idin səhərdən?..”

- “səni, məni gəzirdim,

biz olmayan şəhərdə...”

2013

***

Bir sənsən bu qatarda;

sən düşər.., sən düşərsən...

hərdən bezib qapıdan,

pəncərədən düşərsən...

hara getsən də amma,

bilirsən eyni yerdi...

daha nə yaşasan da,

əvvəli-axırı birdi...

günlər boz yastıq kimi

sifətinə qapanır...

həyat bacadan gedər,

bağlasan da qapını...

... bir azdan zəng vurarlar;

“oyan, adam, payızdı...

adımı soruşursan?

Mətləb, adım Payızdı...”

2013

***

Ötüb gedən günləri,

əyləmək istəyirdim...

adını göy üzünə,

söyləmək istəyirdim...

odla, suyla, küləklə

danışmaq istəyirdim.

hərdən zalım fələklə

dalaşmaq istəyirdim...

nə yaşamaq bilirdim,

nə ölmək istəyirdim...

sən bilmədin, bilmədin,

onda səni sevirdim,

sevilmək istəyirdim...

1996-2013

# 2436 dəfə oxunub

Oxşar xəbərlər

Pərakəndəlik və ailənin fəsadları - Elmir Həsən

Pərakəndəlik və ailənin fəsadları - Elmir Həsən

16:38 2 avqust 2025
Türkiyənin Azərbaycandakı səfiri:  Təhsil, media və mədəniyyət sahələrində fəaliyyətlər dəstəklənməlidir - Müsahibə

Türkiyənin Azərbaycandakı səfiri: Təhsil, media və mədəniyyət sahələrində fəaliyyətlər dəstəklənməlidir - Müsahibə

12:37 31 iyul 2025
"İstəyirsən gül, istəyirsən ağla, bu, bir oxucu kimi..." - Şərif Ağayarın romanı haqqında

"İstəyirsən gül, istəyirsən ağla, bu, bir oxucu kimi..." - Şərif Ağayarın romanı haqqında

12:00 31 iyul 2025
Şirin Fərhadı niyə qurban verdi? - Xosrovun ölüm planı və oğlunun qılıncı

Şirin Fərhadı niyə qurban verdi? - Xosrovun ölüm planı və oğlunun qılıncı

15:00 30 iyul 2025
Özünüzsüz onlara yazdıran əhvalınızı... - Günün şeiri

Özünüzsüz onlara yazdıran əhvalınızı... - Günün şeiri

13:10 25 iyul 2025
Əfsanəvi rokçu Ozzi Ozbornun fanatından duyğulu etiraf

Əfsanəvi rokçu Ozzi Ozbornun fanatından duyğulu etiraf

11:50 25 iyul 2025
#
#
# # #