Noyabrın 2-dən 12-dək Bakıda VIII Avropa Film Festivalı keçiriləcək.

Kulis.az-ın verdiyi xəbərə görə, festival Avropa İttifaqının (Aİ) Azərbaycandakı nümayəndəliyinin, Aİ-yə üzv ölkələrin, eləcə də Norveçin ölkəmizdəki səfirliyinin təşəbbüsü ilə reallaşıb.

Aİ-nin Azərbaycan nümayəndəliyinin rəhbəri Kestutis Yankauskas tədbirə həsr edilmiş mətbuat konfransında məlumat verib ki, festivalın proqramına 21 film daxildir. Bunlar Azərbaycan, Böyük Britaniya, Norveç, habelə Avropa İttifaqının 18 ölkəsinin (Belçika, Bolqarıstan, Çexiya, Xorvatiya, Estoniya, Finlandiya, Fransa, Almaniya, Macarıstan, İtaliya, Latviya, Litva, Hollandiya, Polşa, Portuqaliya, Rumıniya, İspaniya, İsveç) filmləridir.

Festivalın qonaqları arasında tanınmış rejissorlar - bolqarıstanlı Dimitar Kotzev, belçikalı Kadır Balci, portuqaliyalı Juau Nicolau, hollandiyalı Yoram Lürsen var. Onlar Bakıda ustad dərsləri də keçəcəklər. Festival çərçivəsində təşkil ediləcək tədbirlər ictimaiyyət üçün açıq olacaq, yəni giriş sərbəstdir.

Filmlər orijinal dildə nümayiş olunmaqla yanaşı, subtitrlərdən də istifadə ediləcək. Filmlərin nümayişi zamanı interaktiv müzakirələrin keçiriləcəyi də nəzərdə tutulur.

“Park Cinema” kinoteatrlar şəbəkəsinin satış və marketinq üzrə direktoru Musa Axundov qeyd edib ki, festival çərçivəsində 2016 və 2017-ci ildə ekranlaşdırılan filmlər nümayiş etdiriləcək. Filmlər haqqında Aİ-nin Azərbaycan nümayəndəliyinin və “Park Cinema” kinoteatrlar şəbəkəsinin saytında ətraflı məlumat yerləşdirilib.

• "Əskidən milliyyətçiliklə damğalananlar bu gün..." - Rəsulzadənin üzə çıxarılmayan məqaləsi
• Rüstəm Behrudinin əsərləri türk və alman dillərində
• Abşeron Milli Parkında “Duyğular və təbiət” adlı rəsm sərgisi keçirilir