Kulis.Az Aygül Qurbanovanın şeirlərini təqdim edir.

Gözlərimlə sevsəm

Keçməz gecələr

ərmağan etdin mənə..

Və durğun baxışlar...

Artıq hər nəğmədə

Bir hüzn başlar

Ancaq, əzizim,

Sanki sən varmışsan kimi

Ötməkdədir yenə quşlar,

Sadiq qalmaqdadır biri-birinə

Sıx meşə yolundakı ağaclar.

Bir yerdə görsəm deyirəm səni

Adını səsləsəm,

Gəlsəm qoluna girsəm deyirəm..

Alsam götürsəm səni

Bir yerdə qarşılıqlı bir şeylər içsək

Səni bir az da

gözlərimlə sevsəm deyirəm, əzizim.

gözlərimlə sevsəm.

Eşqə və tərəflərə dair

Əgər getdilərsə onlar, haraya getdilər?

Dünən, dünən sual etdim gözlərimə

Nə zaman görəcəyik biri-birimizi təkrar?

Və əgər dəyişibsə görüntün

Çılpaqmı, yoxsa əlcəklimidir əllərin?

Və ya necə duyulur göy üzünün səsi?

Çağlarkən suyun mavisi.

Sevda Sultanova üçün

Yəqin sən də eşitmisən

Deyirlər dünya bir filmdir,

İnsanlar da aktyorlar.

Və əgər belədirsə

Bütün bu teoriyalar

Sən bu filmin tənqidçisisən, əzizim.

Yalnız sən bizə həm bu qədər yaxın,

Həm də bu qədər uzaq ola bilərsən

Sən bu ağrılı filmdə

Bizim görmədiklərimizi görürsən.

Sən izlədiyin filmi də

Sanki yaşayırsan, əzizim.

Bundandır aramızdaymışsan

Kimi görünməyin,

Əslindəysə sən bizi

Kənardan izləyirsən,

Səhvimizi, düzümüzü

Ən yaxşı sən bilirsən.

Və təkcə sən bilirsən ki,

Nəyi daha yaxşı edə bilərdik

Və yaxud da “rejissor”

Bizdən nələri əsirgəyib.

Filmin hansı yerlərində

İşığımızı, səsimizi, sözümüzü,

Yerimizi düzgün verməyib.

Və yalnız sən, əzizim,

Bizim bəsit, məişət həyatımızı

Sanki bir sənət filmiymiş kimi

İzləyə bilərdin.

Bizə bu dəyəri yalnız sən verə bilərdin, əzizim.

Təkcə sən verə bilərdin.

• Tanya xalanın yumşaq bacarıqları - Sahilə Yayanın yeni hekayəsi
• Üzvlükdən azad edilən, töhmət verilən Füzuli Hüseynov kimdir?
• Kanye Uest ikinci dəfə adını dəyişdirdi