Kulis.Az fotoqraf Dadaş Adnanın şeirlərini təqdim edir

***

məni sev

sev

və

tərk etmə

günəş həmişə belə doğsun

sabah bir pəncərəmdən

axşam o biri pəncərəmdən

***

ayı doğrayıb ulduz etdim

səpələdim göy üzünə

minlərlə ulduzum oldu

göy üzündə

***

mən hər bahar aşiq oluram

bağçamdakı güllərə,

çiçəklərə

yağan yağmurlara,

əsən küləklərə

yağmur yağdı yağmurla seviş

külək əsdi küləklə öpüş

gecə kordur, gündüz yalançı

***

mən sabahlara aşiqəm

sabahlara

üzünü görmədən

uyuya bilmirəm

***

gəl,

gecəni sərxoş edib qaçaq

ulduzlar toplayıb tellərindən

qapısına sərək gecənin

***

O gəldi

Mavi bir əlbisədə

Bir az kilo almış

Bir az da saçları uzanmış

Gözləri olduğu kimi

Yaşılın dərinliklərində mavi bir muncuq kimi

O gəldi

Üzündə bir gülüşlə

Günəşi çalmış keçmişin qaranlıqlarından

Siyah buludlardan

Siyah gecələrdən

***

oyandın,

məni də oyatdın

öpürəm,

sabahın gözlərindən

küləyin dodaqlarından

günaydın

***

pəncərəni aç

yeni bir nəğmə girsin içəri

yeni bir şərqi

yeni bir türkü

***

sevə bilməmək,

sevildiyinə rəğmən

acının təməli bu.

***

sabahları quşların səsinə oyanıram

pəncərəmi günəş döyər-döyməz oxumağa başlayırlar

səni necə sevim, çox gözəlsən

səni necə sevməyim, çox gözəlsən

***

erkən oyan günəşi təqib et.

sənə doğru yolu göstərəcəkdir.

***

iki nəfərlik yataq

yalnızlığıma sığmır

sənin yerinə keçirəm

öz yerimə keçirəm

eninə yatıram

düzünə yatıram

çarpaz uzanıram

bir də baxıram sabah olmuş

• "Hekayəti-müsyö Jordan və dərviş Məstəli şah" Türkiyədə səhnələşdiriləcək
• Şekspirin kəllə sümüyü məzarından niyə oğurlandı? - Səbəblər
• Müğənni Nərmin Kərimbəyova təltif edilib