Bu günlərdə çapdan çıxmış “Haqq-nahaq seçilər haqq divanında” kitabı qərbi azərbaycanlıların böyük bir kəsiminin ciddi etirazına səbəb olduğu haqda məlumat vermişdik. 100-ə yaxın qərbi azərbaycanlı ziyalı toplantı keçirərək kitabda tanınmış aşıqlar haqda yanlışlıqlara və Qərbi Azərbaycanda qədim türk adlarının erməniləşdirilməsinə etiraz etmişdi. İddialara görə, kitabda istinadların 90 faizi Ermənistan Milli Arxivində saxlanıldığı iddia olunan sənədlərdir.

Kitabla bağlı qalmaqal həm mətbuatda, həm də sosial şəbəkələrdə geniş müzakirələrə yol açmışdı.

Kitabın müəllifi, “Atatürk Mərkəzi”ndə çalışan Nazir Əhmədli “Yeni Müsavat”a danışaraq qalmaqala aydınlıq gətirib. Müəllif əleyhinə səslənən fikirləri böhtan və iftira adlandırıb və qeyd edib ki, onların heç bir əsası yoxdur:

“Mən Aşıq Ələsgərin və digər 5 nəfərin doğum tarixlərini dəqiqləşdirməkdən başqa heç kimə təhqir, alçaldıcı bir söz yazmamışam, əksinə, Ələsgəri dahi və bu sənətin zirvəsi adlandırmışam. Bu sənədlər göstərdi ki, onun nəinki doğum tarixi indiyə qədər təhrif olunub, ümumiyyətlə haqqındakı hər şey uydurmadır. Məsələn, onun əmisi Allahverdini indiyə qədər babası kimi təqdim edilib. Mən onun əmisi oğlanlarını (3 nəfər) və onların oğlanlarını, yəni xeyli qohum-əqrəbasını üzə çıxarmışam. Təkcə bu məsələyə görə onların bütün nəsli mənə təşəkkür borcludur”.

Müəllif kitabında yer adlarını erməniləşdirilməsi ittihamına da cavab verib: “Mən Bəyazid paşalığından Göyçə mahalına köçürülən ermənilərin yerləşdiyi kəndlərin də adlarının türk kəndləri olduğunu və ermənilərdən əvvəl orada da türklərin yaşadığını yazmışam. M.Yusifov adlı bir nəfər gördüyüm işdən və sənədlərin məzmunundan xəbərdar idi. Mənə təkidlə təklif edirdi ki, ”onların üzərində işləyək", yəni saxtalaşdıraq. Mən buna getmədim və məni indiyə qədər tanıyanlar bilir ki, bütüm ömrüm boyu saxtakarlıq etməmişəm. Bundan sonra M.Yusifov mənə düşmən kəsildi və əleyhimə böhtan və şər kampaniyasına başladı. Amma həqiqət artıq hamıya aydındır. Onlar istinadlar etdiyim İ.Şopeni yalançı sayır, halbuki birincisi başqa mənbə yoxdur. İkincisi isə ona istinadən yazılmış “İrəvan xanlığı” kitabı Dövlət mükafatına layiq görülüb. Onu nəşr edən də AMEA Tarix İnstitutudur. Necə olur ki, onlar həmin mənbəyə istinad edəndə mükafat alır, mən istinad edəndə isə söyülürəm..."

Qeyd edək ki, qalmaqallı kitabın elmi redaktoru “Atatürk Mərkəzi”nin sədri, deputat, akademik Nizami Cəfərov, rəyçisi isə AMEA-nın Folklor İnstitutun xarici əlaqələr departamentinin rəhbəri Əli Şamildir.

Xatırladaq ki, məsələ ilə bağlı Nazir Əhmədli bu gün Kulisin canlı yayımında qonaq olacaq.

• Sərçənin səyahəti - Andrey Platonovun hekayəsi
• Hollivud ulduzu Tommi Li Consun qızı oteldə ölü tapıldı
• Tanrısansa, ətəyini yox, əlini mənə ver! - Qan dolu kasadan nə fərqin var?!