Dekabrın 17-də Azərbaycan Dövlət Akademik Milli Dram Teatrının yeni veb-saytının (azdrama.az) təqdimatı olub.

AzərTAc xəbər verir ki, tədbirdə çıxış edən teatrın direktoru İsrafil İsrafilov saytın hazırlanmasının böyük əhəmiyyət daşıdığını vurğulayıb. Bildirilib ki, teatrın saytı 2007-ci ildən fəaliyyət göstərir. Lakin onun dizaynı və məzmunu qənaətbəxş səviyyədə olmadığından yeni saytın yaradılması zərurəti meydana çıxıb. Yeni sayt həm dizaynı, həm keyfiyyəti, həm də yerləşdirilən materialların həcmi və operativliyi baxımından əvvəlkindən köklü surətdə fərqlənir. Yeni variantda saytın strukturu, məzmunu və keyfiyyəti prinsipial şəkildə dəyişdirilib.
Vurğulanıb ki, yüksək peşəkarlıqla hazırlanmış saytda Akademik Milli Dram Teatrının yaranma və inkişaf tarixi, inzibati və yaradıcı kollektivi, cari repertuarı haqqında geniş informasiya yerləşdirilib. Saytda, həmçinin video və foto albom, kollektivin iştirak etdiyi festivallar və qastrol səfərləri haqqında ətraflı məlumatlarla da tanış olmaq mümkündür.

Diqqətə çatdırılıb ki, bundan sonra teatrsevərlər yeni veb-saytın köməkliyi ilə Akademik Milli Dram Teatrının yaradıcı kollektivinin hər bir uğuru haqqında vaxtında və əhatəli şəkildə məlumat əldə edə biləcəklər.

Sonra azdrama.az internet saytı iştirakçılara təqdim olunub və buradakı bölmələr haqqında geniş məlumat verilib.

Azərbaycan Dövlət Akademik Milli Dram Teatrının tarixi keçmişini və müasir həyatını əks etdirən internet portalı böyük maraqla qarşılanıb.

• Aristotelin Makedoniyalı İsgəndərə dərs dediyi məktəb aşkarlandı
• Xalq artisti xəstəxanaya yerləşdirildi
• Nobel mükafatlarının builki qaliblərinin elan olunacağı tarixlər açıqlandı