Azərbaycan Dövlət Musiqili Komediya Teatrında fəxri adlara, orden və medallara layiq görülən sənətçilərə vəsiqələrin təqdim olunması mərasimi keçirilib.

APA-nın xəbərinə görə, tədbiri giriş sözü ilə açan mədəniyyət və turizm naziri Əbülfəs Qarayev bildirib ki, Azərbaycan teatrı beynəlxalq aləmdə öz gücünü, tarixini layiqincə nümayiş etdirir: "Bu, sözsüz ki, müstəqilliyin bizə verdiyi imkandır. Biz müstəqil olmasaydıq, bizim aktyorlarımız, bəstəkarlarımız, rəssamlarımız beynəlxalq tədbirlərdə Azərbaycan sözünü dilə gətirə bilməyəcəkdilər. On ildə 970-dən çox tamaşa təhvil vermişik. Onlardan 200-ü dövlət sifarişi ilə hazırlanıb. Azərbaycan teatrı 40-a qədər beynəlxalq teatr festivallarında iştirak edib. Bu çox böyük rəqəmdir. Yeddi teatra yeni gənc rejissorlar göndərilib. Bu o deməkdir ki, Azərbaycan teatrı yaşayır, onun istedad mənbəyi tükənə bilməz. Teatr cəmiyyətin aparıcı qüvvəsi və aynasıdır".

Ə.Qarayev əlavə edib ki, hazırda təmir və yenidən qurulmasını gözləyən teatrlarda da işlər davam etdiriləcək: “Biz Opera və Balet Teatrının, İrəvan Dövlət Dram Teatrının, Bakı Bələdiyyə Teatrının yenidən qurulmasını planlaşdırırıq. Azərbaycan teatrının fəaliyyəti dünya teatrının diqqəti mərkəzindədir. Biz qərara gəldik ki, məhz teatr mövsümünün açılışında mədəniyyətimizə töhfə verən insanların yüksək fəaliyyətini qiymətləndirək".

Tədbirin sonunda sənətçilərə "Şərəf", "Şöhrət", "Xalq artisti", "Tərəqqi", "Xalq rəssamı" "Əməkdar incəsənət xadimi", "Əməkdar artist" və s. fəxri adlar və mükafatlar təqdim olunub.

Azərbaycan Kinematoqrafçılar Birliyinin sədri Şəfiqə Məmmədova, xalq artistləri Amaliya Pənahova, İlhamə Quliyeva, Afaq Bəşirqızı, Bəxtiyar Xanızadə və başqaları sənətlərinə verilən qiymətə görə minnətdarlıqlarını ifadə ediblər.

• Mühacir mətbuatımızın fəallarından biri - O, niyə Tiflisdə həbs edilmişdi?
• Milli Qurtuluş Günü ilə əlaqədar silsilə materiallar hazırlandı
• Qulu Ağsəsin yeni kitabının təqdimat mərasimi keçiriləcək