Gürcüstan paytaxtında, SOCAR-ın Gürcüstan nümayəndəliyinin Tiflis ofisində görkəmli Azərbaycan yazıçısı Mir Cəlal Paşayevin “Kəmtərovlar ailəsi” hekayəsinin əsasında “İki yad adam” filminin nümayişi olub.

APA-nın Gürcüstan bürosunun məlumatına görə, film nümayiş olunmamışdan öncə SOCAR-ın Gürcüstan nümayəndəliyinin rəhbəri Mahir Məmmədov çıxış edərək XX əsr Azərbaycan ədəbiyyatının görkəmli nümayəndələrindən biri olan yazıçı Mir Cəlal Paşayevin yaradıcılığı haqqında ətraflı məlumat verib.

O, filmin bir ailənin mənəvi problemlərinə həsr olunduğunu bildirib: “Film müasir dövrün tələblərinə uyğundur və gənclər üçün başa düşülən dildə çəkilib. Onun ekranlaşdırılmasında “ADDIM” Gənclər Təşkilatının rəhbəri Hüseyn Cavadzadə iştirak edib. Film ilk dəfə mart ayında Çinin paytaxtı Pekində “World Cultural Open Organization”-in dəstəyi ilə keçirilən “Grand Asian Film” beynəlxalq festivalının final gecəsində nümayiş olunaraq “Sosial mövzuda ən yaxşı film” və “Ən yaxşı aktyor işinə görə” mükafatlarına layiq görülüb. Apreldə isə filmin Astanada nümayişi baş tutub. “İki yad adam” bu ilin sentyabr ayında Bakıda nümayiş olunacaq”, deyə M. Məmmədov vurğulayıb.

Sonra film nümayiş etdirilib. Filmdə əsas rollarda Əməkdar Artist Gülşad Baxşıyeva, aktyorlar Duyğu Dəvəli, Riad Abdul, Faiq Mirzəyev, Fərqanə Quliyeva, Aysel Osmanlı, Vüsalə Məmmədzadə və başqaları çəkiliblər.

• Əməkdar artist Vahid Əliyev: "Röya, sən nə vaxt sənətkar oldun?" - Müsahibə
• Yad et məni, aşiqanə yad et! - Günün şeiri
• Opera Teatrında “Milli Opera İncilərimiz”