Aprelin 12-də Avstriya Respublikasının paytaxtı Vyana şəhərində fəaliyyət göstərən Azərbaycan Mədəniyyət Mərkəzində Azərbaycan və Avstriyanın gənc rəssam-tələbələrini birləşdirən “Uçan xalça” sərgisinin açılışı olacaq.

Kulis.azın verdiyi xəbərə görə, sərginin təşkilatçıları Azərbaycan Respublikasının Mədəniyyət və Turizm Nazirliyi, Azərbaycan Xalça Muzeyi, Avstriyadakı Azərbaycan Mədəniyyət Mərkəzi və Vyana Tətbiqi Sənət Universitetidir.

Açılış mərasimində Azərbaycan Respublikasının Avstriya Respublikasındakı səfirliyi, Azərbaycan Xalça Muzeyi, Vyana Tətbiqi Sənət Universiteti və Azərbaycan Dövlət Rəssamlıq Akademiyasının rəsmiləri iştirak edəcəklər.

“Uçan xalça” sərgisi “Crossing” (“Kəsişmə nöqtəsi”) layihəsinin yekun hissəsidir. Azərbaycan və Avstriyadan olan tələbələr müxtəlif texnikalarda yerinə yetirdikləri əsərlərini təqdim etdikləri bu layihənin yaradılması üzərində yeddi ay ərzində işləyiblər. Layihənin məqsədi xalçaçılıqda dövrlərin bir-biri ilə əlaqəsini aşkara çıxarılması və bu sənətin ənənələrinin qorunub inkişaf etdirilməsi üzərində qurulub. Tələbələr öz fantaziyalarını, bədii obrazları ənənəvi arxetiplərə gedib çıxan müasir incəsənətin müxtəlif istiqamətlərində işləmək bacarığını nümayiş etdirmişlər. Bu eksperiment kimi XIX əsrə aid qismən tələbələr tərəfindən bərpa edilmiş Azərbaycanın nəfis xovsuz xalçalarından biri olan sumax xalçası götürülmüşdür. Onlar sumaxın səthindəki təsvirləri yaradıcı surətdə dəyişdirir və bu ornamentlər orqanik şüşədə həcm və forma əldə edərək, məkanda uçur və installyasıyanın bir hissəsinə çevrilir.

Qeyd edək ki, sərgi 10 may tarixinədək Vyana şəhərində fəaliyyət göstərən Azərbaycan Mədəniyyət Mərkəzində davam edəcək.

• Bir dəftər üçün oğruya çevrilən uşaq - Tural Turan
• Yeni nəşrlərin vahid elektron reyestrinin yaradılması təklif olundu
• Məşhur aparıcıya xərçəng diaqnozu qoyuldu