Kulis.az gənc şairlər arasında xüsusi dəst-xəttilə seçilən Rəşad Nağı Mustafanın yeni şeirini təqdim edir. Qeyd edək ki, hazırda şairin növbəti şeirlər kitabı nəşrə hazırlanır.

Doktor

İndi ki kədərim barmaqsayıdı
Tələsmə, qoy hələ qırx yaşı keçim
Ağzımdan vuracaq ürək ağrısı
Sözüm kəsiləcək həyat deyəndə
O gün sevincim də təktük olacaq
Mən sənə şeirlər yazacam, doktor
Onda şeirlərim müdrik olacaq.

Tələsmə, qoy hələ qırx yaşı keçim
Yadımdan çıxacaq, verdiyin dərman
yeməkdən sonradı, yoxsa ki əvvəl
əriyib gedəcək dilimin altda
Mən indi peşənə vurulmuşamsa,
Özünü sevəcəm onda, üstəgəl
sənə söz verirəm qocalanda da
ürəyim özümdən böyük olacaq
Mən sənə şeirlər yazacam doktor
Onda şeirlərim müdrik olacaq

Tələsmə, qoy hələ qırx yaşı keçim
Qədrini biləcəm yaşamağın da
Belim bükülsə də, başım yuxarı
Sənin xalatını ağ bayraq edib
Dönüb hey baxacam gəncliyə sarı
Bir az da saçımda ağ tük olacaq
Mənə sənə şeirlər, yazacam doktor
Onda şeirlərim müdrik olacaq

Tələsmə qoy hələ qırx yaşı keçim
Tələsmə qoy hələ altmışa çatım
Atamdan iki yaş böyük olacam
Mən yenə atama möhtac olacam
Məndən yenə nəsə əskik olacaq
Atama şeirlər yazacam, doktor
Onda şeirlərim müdrik olacaq

• "Gülnisə kimi günahkar, əlləri ölümə bulaşmış ananın qızı olmaq..." - Samirə Əşrəf
• Bir körpə, bir mahnı, bir xatirə – O uşağa nə oldu?
• 8 günə 50 min insanı öldürən qərar: "Günahkarların cəzasını verdik..."