Kulis.az “Günün şeiri” layihəsindən Qorxmaz Şıxalıoğlunun yeni qələmə aldığı “Rüşvətxor məmurlara” şeirini təqdim edir.

Vallah, siz Allahı bezdirəcəksiz,
Günəşi bizlərdən küsdürəcəksiz,
Hər yanda qara yel əsdirəcəksiz,
Kişi olun, rüşvət almayın daha.

Palıdların çatlayacaq ürəyi,
Quruyacaq dağın çayı, küləyi,
Olmayacaq dadı, tamı, çörəyin,
Kişi olun, rüşvət almayın daha.

Qurdla qiyamətə qalan deyilsiz,
Cənnətin qəbzini alan deyilsiz,
İnanın, rüşvətsiz ölən deyilsiz,
Kişi olun, rüşvət almayın daha.

O qara mərmərdən boylanan cavan,
Bizim yolumuzda gedibdi qurban.
Utanın o yatan soyuq məzardan,
Kişi olun, rüşvət almayın daha.

Nəfsiniz it kimi hürür, bilirsiz,
Hamını soyursuz bir-bir, bilirsiz,
Görür, xalq sizləri görür, bilirsiz,
Kişi olun, rüşvət almayın daha.

Pis-yaxşı çatmışıq gəlib bu günə,
Nə olar, qayıdın imana, dinə.
Bir Allah eşqinə, Şuşa eşqinə,
Kişi olun, rüşvət almayın daha!

• İran haqlıdır, yoxsa İsrail? - Müharibəyə sevinənlərin səhvi
• Niyazinin övladlığını rədd edən, beş uşağını itirən müğənnimiz kimdir?
• Deputat Aqil Abbas Şərif Ağayarın kitab təqdimatında kimə əsəbiləşdi?