Gənc Şair Rauf Qərib ARB telekanalında yayımlanan “Xalqın şairi” verilişi haqqında özünün Facebook səhifəsində qalmaqallı status yazıb.

Bildirib ki, verilişin müəllif və aparıcısı Mübariz Əsgərova ideyanı o verib. Şair iddia edir ki, mükafata Şəkidəki bağ evini qoyacağını söz verib və birinciliyin ona verilməsi üçün Mübariz Əsgərovla razılaşıb.

Lakin qısa müddət sonra Rauf Qərib Alagöz razılaşmnı pozub, müsabiqədə iştirak etməyəcəyini, evi verməyəcəyini bildirib. Ona görə də verilişin final mərhələsi mart ayına saxlanılıb:

“Bunu yazmağı özümə borc bildim, artıq dayana bilmirəm. Etiraf edirəm ki, Mübarizə “Xalqın Şairi” ideyasını mən vermişdim. Hətta Şəkidə bir bağ evimin olduğunu, müsabiqəyə o evi qoyacağımı, axırda da qalib məni etməsi gərəkdiyini demişdim, razılaşmışdıq. Həm o reklam tutub pul qazanacaqdı, həm də mən “Xalqın Şairi” olacaqdım. Müsabiqə başlayandan sonra nəsə fikrimi dəyişdim və müsabiqəyə qatılmayacağımı, evi də verməyəcəyimi dedim. Bundan sonra ev verə bilməyəcəklərini anlayıb, öz dost-tanışlarından birini birinci edib, söhbəti bağlamağa çalışdılar, amma hay-küy düşdü. Gördülər bu da olmur, ona görə şounun final mərhələsini guya mart ayına saldılar ki, unudulub getsin. Bunun üçün müsabiqəyə qatılan bütün iştirakçılardan üzr istəyirəm”.

Mübariz Əsgərov qalmaqallı ittihamlara cavab verib. O, minval.info-ya açıqlamasında bildirib ki, verilişin ideyası 3-4 il əvvəl onun ağlına gəlib:

“Bu zamana kimi bir çox layihə həyata keçirtmişəm, hamısının da ideyaları özümə aid olub. Mənim dünya görüşüm və təhsilim o səviyyədə deyil ki, başqalarının ideyalarını oğurlayım, insanları aldadım. Aparıcısı olduğum verilişlər insanların maariflənməsinə və yaradıcı fəaliyyətlə məşğul olan şəxslərin tanıdılmasına yönəlib. “Xalqın şairi” verilişi də ucqar kəndlərdə yaşayan, heç kimin tanımadığı neçə-neçə şairi efirə çıxardıb, özünü ifadə etməsinə şərait yaradıb. Bu layihə haqqında sosial şəbəkələrdə qərəzli yazılar paylaşan şəxslərin çoxu da “Xalqın şairi”ndə iştirak edənlərdir, onları insaflı olmağa səsləyirəm. Verilişin ideyası üç-dörd il əvvəl ağlıma gəlib.”

M.Əsgərov Rauf Qəribi səsləndirdiyi ittihamlara görə məhkəməyə verməyəcəyini də deyib:

“Hər yerindən duranı məhkəməyə versək, gərək heç bir iş görməyək”.

• Ağır xəstəliklə mübarizə aparan Selin Dion səhnədə göz yaşlarına boğuldu
• "Ssenari pisdirsə, rejissor yaxşı film çəkə bilməz..." - Kurosavanın kino haqqında qeydləri
• Azərbaycanda Bilik Günü qeyd olunur