Yanvarın 29-da Nizami Kino Mərkəzində Azərbaycanın görkəmli balerinası, SSRİ Xalq artisti, professor Leyla Vəkilovanın 95 illiyi münasibətilə “Vəkilova” sənədli filminin təqdimat mərasimi keçirilib.

Kulis.az xəbər verir ki, təqdimat mərasimində çıxış edən filmin müəllifi və quruluşçu rejissoru Əməkdar artist Samir Səmədov bu layihədə ona dəstək göstərən Mədəniyyət Nazirliyi və Azərbaycan Respublikası Kino Agentliyinə (ARKA) minnətdarlığını bildirib. Ekran əsərinin 2 ay müddətində ərsəyə gəldiyini söyləyən rejissor vurğulayıb: “Leyla Vəkilova mənim müəllimim olub. Leyla xanım müxtəlif illərdə A.Adamın “Jizel”, R.Qlierin “Qırmızı lalə”, P.Çaykovskinin “Sonalar gölü”, “Yatmış gözəl”, “Şelkunçik”, L.Minkusun “Don Kixot”, A.Kreynin “Laurensiya”, B.Zeydmanın “Qızıl açar”, B.Asafyevin “Bağçasaray fəvvarəsi”, Ə.Bədəlbəylinin “Qız qalası”, Q.Qarayevin “Yeddi gözəl”, “İldırımlı yollarla”, S.Hacıbəyovun “Gülşən” və digər baletlərdə yaddaqalan obrazlar yaradıb. Sənətkar klassik balet elementləri və milli rəqs hərəkətlərimizi ustalıqla birləşdirərək uğurla təqdim edib. Yüksək səhnə mədəniyyəti, ifa texnikası onun yaradıcılığının başlıca xüsusiyyətlərindən olub. Ekran əsəri 3 dildə - Azərbaycan, rus, ingilis dillərində nümayiş olunacaq”.

ARKA-nın baş direktoru vəzifəsini icra edən Orxan Fikrətoğlu kinematoqrafçılar tərəfindən hazırlanan bu tip layihələrin reallaşmasını uzun müddətdir arzuladığını qeyd edib. Filmin nümayişinin ardıcıl olaraq iki gün davam edəcəyini söyləyən yazıçı əsl kino sənətinin insanlara yüksək səviyyədə çatdırılmasından məmnunluq duyduğunu bildirib.

Çıxışlardan sonra sənədli film nümayiş olunub.

"AZƏRTAC"

• Azərbaycan dilinin şivələri və özbək dilində ortaq sözlər - Sevinc Qəmbərli
• "Anamdan əmdiyim süd geri qayıtdı" - Həmid Herisçi Anara şeir həsr etdi
• Sankt-Peterburqda beynəlxalq film festivalı LEFF başlandı