ABŞ-d' mərhum pop ulduzu Maykl Ceksonun bacı və qardaşları ilə birlikdə 1984-cü ildə anasına hədiyyə etdiyi gümüşü rəngli "Rolls-Royce" avtomobili satışa çıxarılıb.

Kulis.az xəbər verir ki, bu barədə hərracı təşkil edən Kaliforniyanın "Monza Car" avtodilerinin saytında məlumat yerləşdirilib.

Şirkətdən verilən məlumata görə, maşın ideal vəziyyətdədir, əla hərəkət və idarəetmə göstəricilərinə malikdir. Avtomobilin bütün sənədləri qaydasındadır və indiki sahibi onu hələ 1999-cu ildə əldə edib. Nəqliyyat vasitəsi ilə birlikdə sənətkarın anası Ketrin Ceksonun çərçivəyə salınmış şəxsi, adlı nömrə nişanı da təqdim olunur. Tarixi əhəmiyyət daşıyan bu "Rolls-Royce Silver Spur" avtomobilinin dəyəri 49 035 dollar qiymətləndirilir.

Xatırladaq ki, Ceksonun əşyaları hərraclarda həmişə böyük maraqla qarşılanır. Ötən il müğənninin 1997-ci ildə Fransadakı turu zamanı geyindiyi tək corabı da hərracda 6,2 min avroya satılmışdı. Hərracdan əvvəl isə bu lotun ilkin dəyəri 4 min avro olaraq müəyyənləşdirilmişdi.

Sözügedən corab 27 iyun 1997-ci ildə Nitsa şəhərində baş tutan konsertdən sonra "Şarl Ermann" stadionunda səhnə işçisi tərəfindən tapılmışdı. İfaçının pərəstişkarları bu geyimi çox yaxşı xatırlayırlar, çünki kristallarla bəzədilmiş bərq vuran corablar "Billie Jean" və "Beat It" kompozisiyalarının ifası zamanı məşhur "ay yerişi" (moonwalk) rəqsində aydın görünürdü.

Maykl Cekson kimdir?

Maykl Cekson (Michael Jackson; 29 avqust 1958 – 25 iyun 2009) — amerikalı müğənni, bəstəkar, rəqqas və xeyriyyəçi olub. O, qlobal pop-mədəniyyət tarixində ən əhəmiyyətli və təsirli fiqurlardan biri kimi qəbul edilir və bütün dünyada haqlı olaraq "Popun Kralı" (King of Pop) adlandırılır. Cekson dörd onillik ərzində musiqi, rəqs və moda sahələrindəki bənzərsiz töhfələri ilə sənət dünyasında inqilab edib. Onun 1982-ci ildə işıq üzü görən "Thriller" albomu bütün zamanların ən çox satılan musiqi albomudur. Sənətkarın səhnəyə gətirdiyi "ay yerişi" və robot rəqsi müasir xoreoqrafiyanın təməl elementlərindən sayılır. 15 "Qremmi" mükafatı laureatı olan əfsanəvi musiqiçi həmçinin xeyriyyəçilik fəaliyyətləri ilə də yaddaşlarda qalıb.

• "Halk TV"yə qarşı əməliyyat: 11 nəfər saxlanıldı
• Məşhur aktrisadan Qəzza paylaşımı
• Qobi səhrasında dinozavr yumurtalarını xatırladan muzey – Memarlıq möcüzəsi