Amerikalı avanqard sənətçi və "Qremmi" mükafatı laureatı Lori Anderson "Gələcəyin kitabxanası" layihəsinə qoşulub.

Kulis.az xəbər verir ki, bu barədə "The Guardian" nəşri məlumat yayıb.

Onun yeni əlyazması 88 il ərzində oxucular üçün əlçatmaz qalacaq və yalnız 2114-cü ildə ictimaiyyətə təqdim olunacaq.

Layihənin ideyasına görə, Andersonun əlyazması digər məşhur müəlliflərin əsərləri ilə yanaşı, Oslo ictimai kitabxanasının xüsusi otağında saxlanılacaq. Bütün mətnlər "Gələcəyin kitabxanası" meşəsində yetişdirilən ağaclardan hazırlanan kağızda çap ediləcək. Qeyd edək ki, 2014-cü ildə rəssam Keti Paterson orada min ədəd küknar ağacı əkmişdi.

Anderson etiraf edib ki, layihənin ideyası onu dərhal cəlb edib: sənətçi uşaqlıqdan kitabları, kitabxanaları və meşələri sevir. Müsahibəsində o, səhərlər şokolad batonlarını qoca palıd ağacının budaqları arasında gizlədən və bununla da uşaqları yaxınlıqdakı kitabxanaya baş çəkməyə həvəsləndirən anası ilə bağlı xatirələrini bölüşüb.

Layihənin iştirakçıları arasında Marqaret Etvud, Han Kanq, Ouşen Vuonq, Devid Mitçell, Elif Şəfəq, Karl Uve Knausqor və digər tanınmış müəlliflər var. Əlyazmalar yalnız mətndən ibarət olmaya bilər. Layihənin təşəbbüskarı Keti Patersonun sözlərinə görə, Andersonun işi partitura, təlimatlar toplusu və ya "hələ adını bilmədiyimiz hər hansı bir şey" ola bilər.

Lori Anderson kimdir?

Lori Anderson (Laurie Anderson) — 5 iyun 1947-ci ildə anadan olmuş amerikalı avanqard sənətçi, bəstəkar, musiqiçi və kinorejissordur. O, elektron musiqi və performans sənətinin qabaqcıllarından biri hesab olunur. 1981-ci ildə yayımladığı "O Superman" sinqli ilə dünya miqyasında böyük şöhrət qazanıb. Karyerası ərzində vizual incəsənət, poeziya, musiqi və teatrı sintez edən onlarla unikal layihəyə imza atıb. İnnovativ sənət yanaşmasına görə "Qremmi" daxil olmaqla bir çox nüfuzlu mükafatlara layiq görülüb. O, eyni zamanda əfsanəvi rok musiqiçisi mərhum Lu Ridin (Lou Reed) həyat yoldaşı olub.

• 64-cü Nyu-York Film Festivalının proqramı açıqlandı
• "Heç vaxt ümidsizliyə qapılmamalıyıq, çünki..." - Amerikalı yazıçıdan 10 sitat
• Dinclik tapmağa gələnlər, "İncil"i oxuyub üz tutanlar və pakistanlı rahib...- Müqəddəs Məryəm Katolik Kilsəsindən reportaj