Kult "İnsan qırxayağı" (The Human Centipede) bodi-horror filminin müəllifi, niderlandlı rejissor Tom Siksin faciəvi taleyi məlum olub.

Kulis.az xəbər verir ki, "Variety" nəşrinin məlumatına görə, kinematoqrafçı pərəstişkarları ilə vidalaşmaq qərarına gəlib.

O, özünün "Tom Siksin sonu" (The End of Tom Six) adlı sonuncu filminin nümayiş olunacağını elan edib. Müəllif ekran işini avqustun 15-də müstəqil şəkildə "YouTube" platformasında və DVD formatında yayımlayacaq.

Siks bildirib ki, "Onaniya klubu" (The Onania Club) adlı son bədii filmini yayımlaya bilməməsi onun səhhətinin pisləşməsinin əsas səbəbi olub.

Rejissorun nümayəndələri qeyd ediblər:

"O, 14 il ərzində dağınıq sklerozdan əziyyət çəksə də, diaqnozunu sirr olaraq saxlayıb. "İnsan qırxayağı" trilogiyasından sonra o, 2019-cu ildə "Onaniya klubu" adlı yeni bir satirik film çəkdi. Fanatların premyera tələblərinə və müsbət rəylərə baxmayaraq, politkorrektliyin dominantlıq etdiyi kino sənayesi bu filmə yaxın durmaqdan imtina etdi. Uzun sürən və həddindən artıq gərgin keçən bu mübarizə onun xəstəliyini sürətləndirdi və orqanizmini o dərəcədə məhv etdi ki, o, artıq ömrünün sonuna yaxınlaşır".

Məlumata görə, "Tom Siksin sonu" kino layihəsi üçün rejissor səhhətinin necə pisləşməsini lentə alıb.

Mətbuat açıqlamasında bildirilir:

"Altı il ərzində o, Amsterdamdakı evinin qaranlığında, tam təcrid olunmuş vəziyyətdə yaşayıb. İtirəcək heç nəyi qalmamışdı və sonuncu dəfə nəsə yaratmaq ideyasına aludə olmuşdu. Aktyorların da iştirak etdiyi, qızdırmalı bir yuxunu xatırladan bu əyləncəli sənədli film mövcudluğun absurdluğundan, kino sənayesindən, onun öz ölümündən və yaradıcılıq azadlığının məhdudiyyətlərindən bəhs edir. Əzab çəkən sənətkar mifi sadəcə bir əfsanə deyil".

Tom Siks kimdir?

Tom Siks (Tom Six) 29 avqust 1973-cü ildə Niderlandda anadan olmuş kinorejissor, ssenarist və prodüserdir. O, xüsusilə dünya kinosunda ən qalmaqallı, iyrənc və qeyri-adi ekran işlərindən biri hesab olunan "İnsan qırxayağı" (The Human Centipede) bodi-horror trilogiyası (2009, 2011, 2015) ilə məşhurluq qazanıb. Siksin filmləri əsasən qara yumor, bədən transformasiyası və cəmiyyətdəki tabu mövzularına sərt formada toxunması ilə seçilir. Layihələri tənqidçilər və cəmiyyət tərəfindən birmənalı qarşılanmasa da, qorxu janrının həvəskarları arasında özünəməxsus kult statusu əldə edib.

• “Fotoqrafiya sənəti” üzrə tədris proqramı - Azərbaycanda ilk dəfə
• Fələstinli müğənni Amerika turunu təxirə saldı - Səbəb
• Həmidə Ömərova: "Həmişə Kinematoqrafçılar İttifaqının inkişafına xidmət eləmişəm"