Münsiflərin bu il oxunulan ən qeyri-adi kitab kimi xarakterizə etdiyi əsər tarixi romanlar üzrə Valter Skott mükafatına layiq görülüb.

Kulis.az xəbər verir ki, Elis Collinin qələmə aldığı "Kibrit qutusu qızı" adlı roman 1930-cu illərdə nasist işğalı altındakı Vyanada cərəyan edən dəhşətli hadisələrdən bəhs edir.

Əsərin mərkəzində Vyana Uşaq Xəstəxanasında doktor Hans Aspergerin lal və autizmli xəstəsi olan Adelheyd Brunnerin hekayəsi dayanır.

Elis Colli mükafatını Melroz yaxınlığında keçirilən Borders Kitab Festivalında Valter Skottun nəticəsinin nəvəsi Metyu Maksvell Skottdan qəbul edib.

Abbotsford Trastı tərəfindən təşkil edilən və artıq 17-ci ildir təqdim olunan bu nüfuzlu mükafatın əvvəlki qalibləri arasında Sebastyan Barri, Robert Harris, Andrea Levi və Hilari Mantel kimi məşhur yazıçılar var.

Qeyd edək ki, bu il mükafatın tarixində ilk dəfə olaraq qısa siyahıya düşən namizədlərin hamısı britaniyalı müəlliflər olub.

Mükafata layiq görüldüyü üçün böyük sevinc hissi keçirdiyini bildirən Elis Colli bunun tarixi romanların həqiqətən ciddi bir ədəbiyyat növü olduğunu sübut etdiyini deyib:

"Bu, həddindən artıq təsirli və inanılmaz dərəcədə həyəcanvericidir. Sanki bütün ömrüm boyu başıma belə bir şeyin gəlməsini gözləmişəm. Bu, gerçəkləşən bir xəyaldır və düşünürəm ki, yazıçılıq həyatımı tamamilə dəyişdirəcək".

Münsiflər heyəti müəllifin işinin orijinallığını, yeniliyini və iddialı olmasını yüksək qiymətləndirərək əsəri belə şərh ediblər:

"Səmimiyyəti, təsirliliyi və hekayəni nəqletmə ustalığına görə 2026-cı ilin qalibi həm də ən vacib kitablardan biri olacaq".

• Parisdə Azərbaycan mətbəxi rəğbətlə qarşılandı
• Əri “xalq düşməni” elan edildi, Cəfər Cabbarlı çadrasını açdı – İzzət Orucovanın ağır taleyi
• "Yerdə bir ruh itmiş bədənini axtarır..." - Yunan şairdən "Səhər saatlarının baxışı"