Muzey Mərkəzində Azərbaycan Mədəniyyət Nazirliyinin təşəbbüsü ilə həyata keçirilən müharibədən sonrakı “İgidlərin sözü” adlı məşhur layihənin ikinci antologiyasının təntənəli təqdimatı keçirilib.

Kulis.az xəbər verir ki, birinci antologiya da Mədəniyyət Nazirliyinin dəstəyi ilə beş il əvvəl - Vətən müharibəsində Qələbədən dərhal sonra, Azərbaycanın 44 gün ərzində erməni işğalçılarını məğlub edərək Qarabağın işğalına son qoymasının ardından nəşr olunub.

Tanınmış şair və ictimai xadim Nigar Həsənzadə tərəfindən əsası qoyulan “İgidlərin sözü” layihəsi postmüharibə dövründə ölkənin mədəni həyatında hadisə olmaqla yanaşı, həm də istedadlı qaziləri - şairləri, musiqiçiləri və vokalçıları bir araya gətirən əhəmiyyətli bir reabilitasiya və sosial layihəyə çevrilib.

“Layihənin mövcud olduğu beş il ərzində iştirakçı şairlər ölkənin ən nüfuzlu məkanlarında çıxış ediblər, bu heyrətamiz gəncləri dinləmək və onlarla görüşmək şansı qazanan hər kəsin böyük marağına səbəb olublar. Onların böyük uğur qazanan şeirləri antologiyalara daxil edilib. Qazi-şairlər televiziya və radioda çıxış etmək üçün dəvətlər almağa başlayıb və bir çoxu sosial mediada tanınıb. Onların arasında müxtəlif ədəbi festivalların, müsabiqələrin, marafonların iştirakçıları və Prezident təqaüdçüləri var. 2022-ci ildə bu layihə Şuşada məşhur Molla Pənah Vaqif Poeziya Günləri festivalının açılışını edib və həm ölkə daxilində, həm də xaricdəki həmvətənlərimiz arasında böyük əks-səda doğurub”, - deyə o qeyd edib.

Proqramın rəsmi hissəsində Mədəniyyət nazirinin müşaviri Orxan Fikrətoğlu, şair və layihənin direktoru Nigar Həsənzadə, Birinci Qarabağ müharibəsi veteranları - polkovnik-leytenant Elmar Hüseynov və polkovnik-leytenant Elxan Məmmədov, habelə Milli Məclisin deputatı Vüqar İsgəndərov çıxış ediblər.

Gecədə, həmçinin İkinci Qarabağ müharibəsi qəhrəmanı Denis Quzlayev və Birinci Qarabağ müharibəsi zamanı həlak olan Azərbaycanın Milli Qəhrəmanı Yuri Kovalyovun qızı Regina Kovalyova da iştirak ediblər.

İkinci antologiyanın təqdimatında şairlər və musiqiçilər — Qarabağ müharibəsi qaziləri Eyvaz Eyyub, Miri Abdullayev, Cavid Qasımov, Kərəm Aydın, Məbud Əhmədov, Fərid Atazadə, İdris Hüseynov, Elşən Bənnayev, eləcə də layihənin ən gənc iştirakçısı, səkkizinci “Muğam” Televiziya Müsabiqəsinin qalibi Həzrət Əzizlinin çıxışlarından ibarət bədii-musiqili proqram da təqdim olunub.

• "Bunker" filminin ulduzu vəfat etdi
• Montrödə Azərbaycanın incəsənət nümayəndələrinin iştirakı ilə qala konsert keçirildi
• "Netflix"dən Metyu Perri haqqında yeni sənədli film