Bu gün tanınmış yazar Xan Rəsuloğlunun doğum günüdür. Kulis.az bu münasibətlə yazarı təbrik edir və onun aforizmlərini təqdim edir.

Qaymaq yedizdirib, maymaq böyütdük.

***

Dərd eləmə, dərs elə.

***

Siyasətdə əsas məsələ xalqı əsas məsələlərdən yayındırmaqdır.

***

Oğru qardaş, hamı bilir oğrusan, amma səni tutanlardan doğrusan.

***

Pulun dilini hamı bilməsə də, pul hamının dilini bilir.

***

Hər hürənə bir daş atsan, yarı yolda qalacaqsan.

***

Dünyanın, heç nəyi ciddi qəbul etməyən ən ciddi adamıyam.

***

Yaxşılıq elə, özünə ziyan vurmadan.

***

Həqiqət dairəvidir, hər kəsə də durduğu yerdən görünür.

***

Vaxt itirib pul qazananların ən böyük amacı, pul verib vaxt qazanmaqdır.

***

"Pul əl çirkidir" - deyənlər, əlləri həmişə çirkli olanlardır.

***

Uşağı oynatmazlar, uşaqla oynayarlar.

***

Qurdun quzu üçün dişi göynəyir.

***

Qarnımıza yemirik, qarnımız yeyir bizi.

***

Baş qazandır, nəsə bişirməlisən.

***

Qanmazın qanmazlığı qananın qazancıdır.

***

Roman yazmağa nə var ki, çətini söz deməkdi.

***

Uduza-uduza udan görmüşəm, udansa qanmayıb uduzduğunu.

***

Ömür qısa deyil, yaşımdan utanıram.

***

Səbr cəbri həll edər.

***

Eşqi məşq eləməzlər.

***

Dostum - səhvlərimin aynası.

***

Həqiqətin əsgəri ol, həqiqəti dilənmə.

***

O qədər də yaxşı olma ki, sənə avam desinlər.

***

Lazım gələndə kişilik göstərmək yox, hər zaman kişi olmaq gərəkdir.

***

Ən böyük allahsızlığı, görürsən elə allahın adından danışanlar eləyir.

***

İnsan ölür, təki insanlıq ölməsin.

***

Pis millət yoxdur, pis tərbiyə var.

***

Təbiətimiz yalan demir, tərbiyəmiz yalan danışır.

• Azadlıq quşu - Aron Tamaşinin hekayəsi
• Beynəlxalq Bakuvi Konfransının bölmə iclasları keçirildi
• "Şabanoğlu Şaban" filminin davamı çəkiləcək