Prezident Kitabxanasının Kolleksiyalar bölməsinin “Ədəbi irs” adlı alt bölməsində müasir Azərbaycan ədəbiyyatının görkəmli nümayəndəsi, Xalq şairi Bəxtiyar Vahabzadənin yaradıcılığına həsr olunmuş yeni virtual kolleksiya yaradılıb.

Kulis.az xəbər verir ki, virtual kolleksiyada Bəxtiyar Vahabzadənin şair, alim və dramaturq kimi fəaliyyətini əks etdirən çoxsaylı şeir kitabları, poemaları, teatr səhnəsində uğurla tamaşaya qoyulmuş pyesləri, eləcə də elmi-publisistik əsərləri və monoqrafiyaları toplanıb. Bu nəşrlər bütövlükdə görkəmli ədibin yaradıcılığının zənginliyini, ictimai münasibətləri və insanın daxili dünyasını ustalıqla əks etdirmək bacarığını nümayiş etdirir.

Tədqiqatçılar və geniş oxucu kütləsi üçün etibarlı informasiya resursu rolunu oynayan bu virtual kolleksiya Bəxtiyar Vahabzadənin bədii-fəlsəfi dünyasına dərindən bələd olmaq, eləcə də onun ədəbi-tarixi irsini rəqəmsal mühitdə yaşatmaq məqsədi daşıyır.

Qeyd edək ki, Bəxtiyar Vahabzadə Azərbaycan poeziyasında vətəndaşlıq mövqeyinin güclənməsi və fəlsəfi lirikanın inkişafı baxımından müstəsna xidmətləri olan qüdrətli söz ustasıdır. Onun insan və zaman, mənəvi dəyərlər, milli kimlik və ictimai məsuliyyət məsələlərini əhatə edən bədii irsi, xüsusilə azərbaycançılıq məfkurəsi milli özünüdərk prosesində müstəsna rol oynayır. Ana dilimizin saflığının qorunmasına mühüm töhfələr verən, “Gülüstan” və “Şəhidlər” kimi poemalarında xalqın taleyini bədii ümumiləşdirmə səviyyəsində əks etdirən ədib milli ədəbi-ictimai təfəkkürün inkişaf tarixində dərin iz qoymuşdur.

Bəxtiyar Vahabzadənin əsərləri yarandığı dövrdən etibarən bir çox xarici dillərə tərcümə edilərək geniş coğrafiyada yayılmış və müəllifinə böyük şöhrət qazandırmışdır. Yalnız şair və dramaturq kimi deyil, akademik, Milli Məclisin deputatı və aktiv ictimai xadim kimi də fəaliyyət göstərən B.Vahabzadənin çoxşaxəli yaradıcılığı müasir Azərbaycan ədəbiyyatının inkişafında mühüm mərhələ təşkil edərək milli-mədəni yaddaşın formalaşmasında əhəmiyyətli rol oynamışdır.

• “Hörümçək adam” ilk gün nümayişində rekord qırdı
• Astarada Əlişa qalasında qazıntılar zamanı qədim memarlıq elementləri aşkarlandı
• Devid Linçin ssenarisi illər sonra ortaya çıxdı