Rusiyanın Xalq artisti Anna Netrebko sanksiyalara məruz qaldıqdan və karyerasında məcburi fasilənin yaranmasından sonra Ukraynada aparılan hərbi əməliyyatları tənqid edib.

Kulis.az xəbər verir ki, bu barədə sənətçi öz feysbuk hesabında yazıb.

"Ukraynadakı hərbi əməliyyatları qınayıram. Ağlım bu müharibənin qurbanları və ailələri ilədir. Mövqeyim aydındır. Heç bir siyasi partiyanın üzvü və heç bir Rusiya liderinin müttəfiqi deyiləm. Keçmiş hərəkətlərimin və ya ifadələrimin səhv şərh olunduğunu etiraf edirəm, buna təəssüflənirəm" deyə, opera ifaçısı vurğulayıb.

O, Rusiya hökumətindən maliyyə yardımı almadığını və yalnız bir neçə dəfə Rusiya Prezidenti Vladimir Putinlə görüşdüyünü bildirib:

"Əslində, prezident Putinlə həyatımda yalnız bir neçə dəfə, musiqi fəaliyyətimə görə mükafatlar alarkən və ya Olimpiadanın açılış mərasimində görüşmüşəm. Heç vaxt Rusiya hökumətindən maliyyə dəstəyi almamışam. Avstriyada yaşayıram və vergi rezidentiyəm.

Vətənim Rusiyanı sevirəm və yalnız sənətimlə sülh, birlik axtarıram. Elan edilmiş fasilədən sonra mayın sonunda ilk olaraq Avropada çıxışlarımı davam etdirəcəyəm".

Qeyd edək ki, A.Netrebko Xalq artisti Yusif Eyvazovun həyat yoldaşıdır. O, uzun müddət Ukraynadakı vəziyyətlə bağlı şərh vermədiyinə görə, çalışdığı bir çox məşhur teatrla yollarını ayırmalı olmuşdu.

• Repressiya qurbanı olmuş qadının adı Bakıdakı küçədən niyə götürüldü?
• Post-prodakşn müsabiqəsinin qalibləri açıqlandı
• Sərxoş gəlmişəm qapına - Şaiq Vəli