Yeni təsis olunmuş müstəqil “Çıxış” teatrının ilk tamaşası təqdim olunub.

Bu barədə Kulis.az xəbər verir.

Türk dramaturqu Müzəffər İzgünün “Sərhəd” pyesi əsasında hazırlanmış “Tikanlı münasibətlər” adlanan tamaşanın quruluşçu rejissoru İmam Həsənovdur.

Aktyorlar Niyaz İlyasoğlu və Qorqud Cəfərin iştirak etdiyi tamaşada sərhəddə xidmət çəkən iki əsgərdən – Matidən və Yuandan bəhs olunur. İki düşmən ölkənin əsgərləri bu qədər yaxın qonşuluqda doğmalaşır, onlar bir-birlərinə ailələrindən, kəndlərindən, sevgililərindən danışırlar, xəyallarını, arzularını bölüşürlər, evdən gələn, arzusunda olduqları yeməklərini paylaşırlar, bir-birinin kürəyini qaşıyırlar, hətta bir-birlərini evlərinə qonaq da dəvət edirlər. Bu sərhəd insan ünsiyyəti qarşısında corab qurutmaq üçün zivəyə, voleybol oynamaq üçün tora çevrilib. Amma Mati də, Yuan da asılıdır, onlar canlı insandır, amma həm də sərhəddə addımlamalı olan mexanizmdir. Hücum əmri verilən kimi gərginlik başlayır. Əsgər tabe olmalıdır. Yuan Matinin silahını qapır - indicə komandirinin əmrinə görə, Matini öldürməlidir. Amma bir az əvvəl onlar evdən gələn yeməyi bölüşmüş, eyni mahnını oxumuş, rəqs etmişdilər...

Tamaşa müharibə kimi sərt şərtlərin altında belə insanlığı qorumaq kimi ciddi bir məsələdən danışır.

• Stiven Kinq Aqata Kristini geridə qoyaraq rekord qırdı
• Şəbnəm Tovuzlu da Rusiyaya buraxılmadı
• Kukla Teatrı Qazaxıstandakı festivalda iştirak edib