Azərbaycanda istehsal olunmuş “Stalinin qaranlıq keçmişi” və “Nobel qardaşlarının ilk uğuru” sənədli filmləri daha bir uğura imza atıb. Belə ki, azərbaycanlı rejissorun “Nobel qardaşlarının ilk uğuru” filmi 11 ildir keçirilən “Light of the world” adlı Yaroslavl festivalının seçilmiş filmlər siyahısına daxil olunub.

Kulis.az xəbər verir ki, bunu Azərtac-a açıqlamasında filmlərin ssenari müəllifi, quruluşçu rejissoru və baş prodüseri Cəlaləddin Qasımov deyib.

Onun sözlərinə görə, layihə 2021-ci ilin sentyabrında Rusiya Federasiyası Prezidentinin qrantı əsasında həyata keçiriləcək. Festival, həmçinin Yaroslavl vilayətinin rəhbərliyi və Müasir PravoslavI Sənət və Rəsm Qalereyası tərəfindən dəstəklənir. Festivalın məqsədi gənclərin mənəvi, vətənpərvər tərbiyəsini təbliğ etməkdir.

“Stalinin qaranlıq keçmişi” filmi Moskvada 23 ildir keçirilən “İnternational Film Festival of Detective Films and Television programs on Law-Enforcement themes Detective FEST” festivalında bütün mərhələləri keçərək, “Nominant”a layiq görülüb. Film birincilik uğrunda bu ilin sentyabrında Moskvada keçiriləcək finalda ölkəmizi təmsil edəcək. Ekran əsəri 79 ölkənin 2300 filmi arasından “Nominant” olaraq seçilib. “SSP Production” şirkətinin ekranlaşdırdığı “Stalinin qaranlıq keçmişi” filminin redaktoru Əkbər Qoşalıdır və mətni isə Xalq artisti Eldost Bayram oxuyub. Ekran əsərində kapitalizmin ən böyük düşməni, minlərlə insan ölümünün baiskarı kimi tanınan qəddar Stalinin ömür yoluna, xüsusilə də Bakıdakı fəaliyyətinə xüsusi yer ayrılıb.

Festival Rus Pravoslav kilsəsinin (Rubinsk yeparxiyası) və Milli Müəllif Hüquqları Sahiblərinə Dəstək Fondu (Moskva) tərəfindən təşkil olunur.

“SSP Production” tərəfindən istehsal olunan “Nobel qardaşlarının ilk uğuru” sənədli filmi isə Nobel qardaşlarının Bakıdakı fəaliyyətindən bəhs edir. Filmin redaktoru Əkbər Qoşalı, qrafika ustası Xəqani Məmmədovdur. Mətni Xalq artisti Eldost Bayram oxuyub.

• Çindən "Mehmed: Fetihler Sultanı" serialındakı bu səhnəyə görə TRT-yə rəsmi xəbərdarlıq
• "Türk Dünyası Həftəsi” adlı elektron resurs bazası istifadəçilərin ixtiyarına verildi
• Məşhurların Haluk Leventin dərnəyinə bağışladığı məbləğlər açıqlandı