Moskvada 48-ci Moskva Beynəlxalq Film Festivalının yekunları vurulub, müxtəlif ölkələrdən və janr kateqoriyalarından olan laureatların adları açıqlanıb.

Kulis.az xəbər verir ki, bu barədə festivalın teleqram kanalında məlumat yayılıb.

"Qızıl mükafat" Hindistana getdi

Festivalın ən nüfuzlu mükafatı olan Ən yaxşı filmə görə "Qızıl mükafat" hindistanlı rejissor Fazil Razakın "Ehtiras" filminə verilib.

Münsiflər heyətinin Xüsusi mükafatını isə Daniel Qusmanın "Əvəz" ekran əsəri qazanıb.

Ən yaxşı rejissor işinə görə mükafata "Vıqotski" filmi ilə Anton Biljo layiq görülüb.

Aktyor oyununa görə mükafatlar isə Sergey Qilyova (Rusiya, "Vıqotski") və Amrutha Krişnakyumara (Hindistan, "Ehtiras") təqdim edilib.

Digər nominasiyalar və qaliblər

Rusiya Mədəniyyət Nazirliyinin dəstəyi ilə ərsəyə gələn "Ata" döyüş-dramı ("Kinomir" prodüser şirkəti və "KION" onlayn kinoteatrının birgə istehsalı) "Tamaşaçı rəğbəti" mükafatına layiq görülüb.

"Rusiya premyeraları" müsabiqəsində Viktor Şamirovun "Kainatın temperaturu" filmi ən yaxşı ekran işi seçilib. Çinli rejissor Syuysun Çjenin "Evə aparan uzun yol" əsəri isə "Ən yaxşı sənədli film" mükafatını qazanıb.

Qeyd edək ki, bu il aprelin 16-dan 23-dək davam edən festivalda 19 dünya və beynəlxalq, həmçinin 96 Rusiya premyerası olmaqla, ümumilikdə 200-ə yaxın film nümayiş olunub. O cümlədən, əsas müsabiqə proqramında İtaliya, Argentina, Hindistan, Cənubi Koreya və digər ölkələrdən 13 film təqdim edilib.

• Sanballı tarixi-bioqrafik romanların müəllifi - O, hansı erməni millətçisini susdurmuşdu?
• "Müqavilələrdə qanun pozuntusuna yol verilir..." - Birgə bəyanat
• İsa Həbibbəyli: "Laçında və Kəlbəcərdə arxeoloji tədqiqatlar aparmağı təşkil etməliyik"