Anar mətbuata verdiyi son müsahibəsində deyir: “O vaxt da Dədə Qorqud haqqında yazmaq asan deyildi. O dastan damğalanmışdı”.

Sual olunur, dövlət sifarişi ilə çəkilən bir filmə ssenari yazmaq nə zamandan çətin olub?

“Dədə Qorqud” dastanı Sovet illərində çap olunub.

Mircəfər Bağırovun bu dastana qarşı mənfi münasibəti olsa da, film çəkiləndə Mircəfərin güllələnməsindən 20 il keçirdi.

Anarın yazdığı ssenari haqda uzun danışmağa dəyməz, hamı filmi görüb.

Və dastanı oxuyanlar filmdə onun ruhundan bircə qətrə də olmadığını bilir.

Asan olmayan filmlər olub, əlbəttə.

Sizə bir filmin tarixini yazacağam.

Filmin adı “Yol”dur, Yılmaz Güney ssenarisini yazıb çəkmişdi.

Torpaqsız bir kürd ailənin uşağı idi Yılmaz.

Adanada doğuldu, böyüdü.

Oxumaq üçün İstanbula gəldi.

24 yaşında həbs edildi, il yarım həbsdə qaldı.

Günahı kommunizm təbliğatı idi.

O illərdə isə Anar türk şairi Ataol Bəhramoğlunun ehtirasla danışdığı marksist fikirlərə güldüyünü sonralar yazacaqdı.

Ataol da marksist olduğu üçün uzun illər Fransada yaşamağa məcbur olmuşdu.

Yılmaz Güney dalbadal filmlər çəkməyə və filmlərdə çəkilməyə davam etdi.

35 yaşında inqilabçılara yardım etdiyi üçün yenidən həbs edildi, üç il həbsdə qaldı.

Həbsxanadan jurnal buraxırdı, hekayələr yazırdı.

Həbsdən çıxandan bir il sonra yenidən həbs edildi, 5 il həbsdə qaldı.

“Yol”un ssenarisini də bu zaman yazdı.

Həbsxanadan birbaşa Fransaya qaçdı.

Amma filmi Türkiyədə çəkilirdi.

Onu bir rejissordan alıb, başqasına verdi.

Texniki işləri isə Fransada özü tamamladı.

Filmdə çəkilmək böyük hünər istəyirdi, dövlətin içəri atdığı bir siyasi məhbusun filmində oynamaq ASAN DEYİLDİ.

Filmin musiqisinin yazan Zülfü Livaneli titrlərində öz adını yazdırmaq istəyirdi, lakin dostları ona mane oldular.

Bu Zülfü Livaneli evdə otura-otura təyyarə qaçırtmaq “cinayət”indən məhkəmə qarşısına çıxarılmışdı.

Əsasən solçu aktyorların oynadığı filmin baş roluna Tarık Akan sahib çıxdı.

Film Türkiyənin o dövrlərdə xəyal edə biləcəyi bir mükafatı - “Kann” mükafatını aldı.

Asan olmayan film belə olur...

• "Süd kəsilsin deyə dərman qəbul etmək olmaz" - APAMED
• Keçmiş nazir: "Miri Yusif və Röyaya qulaq asıram" - Müsahibə
• Çaldıran döyüşü Kərbəla faciəsinin ideoloji davamıdır - Fəxri Uğurlu