Fövqəladə hallar uşaqların gözü ilə

Sənət

Ana səhifə
Sənət

Fövqəladə hallar uşaqların gözü ilə

1 iyun 2011

15:25

İyunun 1-də Muzeylər Mərkəzində Fövqəladə hallar və Təhsil nazirliklərinin birgə layihəsi olan “Fövqəladə hallar uşaqların gözü ilə” adlı I Ümumrespublika yaradıcılıq müsabiqəsinin qaliblərinin mükafatlandırılma mərasimi keçirilib.

Kulis.az-ın məlumatına görə tədbirdə hər iki nazirliyin nümayəndələri iştirak ediblər.

Uşaqların Beynəlxalq Müdafiəsi Günündə təşkil olunan müsabiqə 28 dekabr 2010-cu il tarixində elan olunub və 2011-ci il aprelin 30-da yekunlaşıb. Müsabiqəyə “Rəsm”, “Plakat”, “Əl işi”, “Yumşaq oyuncaq”, “Yanğın və qəza-xilasetmə texnikasının modeli”, “İnşa”, “Hekayə” və “Şeir” nominasiyaları üzrə işlər təqdim olunub. Müsabiqədə bütün rayon və şəhərlərin orta məktəbləri iştirak edib.

Tədbirdə çıxış edən fövqəladə hallar nazirinin müavini, tibb xidməti general-leytenantı Faiq Tağızadə bildirib ki, müsabiqənin keçirilməsində məqsəd uşaqlarda təhlükəsiz həyat fəaliyyəti mədəniyyətinin formalaşdırılması, ictimaiyyətin diqqətinin fövqəladə hal probleminə cəlb edilməsi, yetişməkdə olan gənc nəslin vətənpərvər ruhda tərbiyə edilməsi, eləcə də istedadlı uşaqların üzə çıxarılmasıdır.

Daha sonra birinci yeri tutmuş 28 məktəbliyə mükafatlar təqdim olunub və FHN əməkdaşları onların əl işləri ilə yaxından tanış olublar. Eyni vaxtda iki zalda təşkil olunan tədbirdə 2 və 3-cü yerləri tutan şagirdlərin mükafatları da təqdim olunub. Müsabiqədə 14 həvəsləndirici mükafat da sahibinə təqdim olunub.

Vüqar QURDQANLI