Bu gün ABŞ yazıçısı Abraham Merrittin anım günüdür.

Kulis.az onun əsərlərindən sitatları təqdim edir.

Sevirsənsə, son həddinə qədər sev; nifrət edirsənsə, elə iblis kimi nifrət et; yox, əgər davaya girmisənsə, ən qızğın yerinə atıl və cəhənnəm oduna dönüb vuruş, yoxsa yaşamağa dəyməz.

***

O, lap əvvəldən bu yerin, yəqin ki, təsirləri adlandırıla biləcək havasına qarşı qəribə bir həssaslıq göstərirdi. Deyirdi ki, buradan xortdanların və cadugərlərin qoxusu gəlir.

***

Əlbəttə, anlayıram ki, dünya düşündüyümüz kimi deyil, deməli, qeyri-mümkün sandığımız hər şey burada mümkündür deyə mühakimə yürütmək əsl məntiq sayılmaz. Dünya fərqli olsa belə, o da qanunlarla idarə olunur. Əsl qeyri-mümkün olan şey qanunların xaricində qalandır; heç bir şey qanundan kənarda ola bilməyəcəyinə görə, qeyri-mümkün deyilən bir anlayış da mövcud ola bilməz.

***

Gözlərim önündə Parlaq Varlığın burula-burula dünyamıza daxil olduğu bir mənzərə canlandı: təcəssüm tapmış, əbədi Şərin canavar cildli, əzəmətli, alovlu sütunu; qurbanları bürüdüyünü gördüyüm o dəhşətli, qeyri-adi ölümcül həyata doğru insanların onun nur saçan qucağından keçib getməsi; yaşıl şüanın ritmik ölümü altında orduların almaz tozu kimi rəqs edən atomlara çevrilib titrəməsi; Olafın iş başında seyr etdiyi o biri iblisanə qüvvənin qanadlarında şəhərlərin fəzaya sovrulması; sakinin sarayındakı gözəgörünməz qatillərin cəhənnəmin hər cür ehtirasını özləri ilə daşıyaraq gizlicə dolaşdığı kabus dolu bir dünya; həm bəşəriyyətin mistikləri və yırtıcıları, həm də zəif və ruhi müvazinəti pozulmuş hər bir bədxah ruhun bu məxluqun ətrafında toplaşması... Çünki çox yaxşı bilirdim ki, bu iblis-tanrı bir dəfə zəncirdən çıxsa, heç bir xalq onun qarşısını uzun müddət ala bilməz və onun lənəti sürətlə hər yana yayılacaq!

***

Pyerin dediyi kimi, zərbəmizi vuracağıq. Can atdığın o pöhrəliyə zərbə endirəcəyik. Ora vuracağıq, çünki orası meşənin düz ürəyidir. Meşənin gizli həyatı orada coşub-daşır. Biz də bilirik, sən də bilirsən! Məhv edildiyi təqdirdə meşənin canını alacaq bir şey — meşəyə onun ağaları olduğumuzu anlatmalıdır.

***

Tamaşa edən qadınların arasında bir canlanma yarandı. İçlərindən biri əlində yaşıl büllura çevrilmiş incə yarpaqları xatırladan bir qədəhlə irəli çıxdı. O, kabusabənzər ağaclardan birinin gövdəsi yanında dayandı, yuxarı uzanıb bir budağı özünə tərəf əydi. Gözlərində yarı-qorxu, yarı-küskünlük olan incə bir qız onun yanına süzüldü və qollarını həmin ruhani gövdəyə doladı. Əlində qədəh olan qadın budağı əyib ox ucluğuna bənzər bir yəşəm qəlpəsi ilə dərindən kəsdi. Yaradan axan zəif sədəf rəngli maye yavaş-yavaş qədəhi doldurdu. Qədəh dolduqda Makkayın yanındakı qadın irəli addımlayıb uzun əllərini qanayan budağa sıxdı. O geriyə çəkiləndə Makkay axının kəsildiyini gördü. Qadın titrəyən qıza toxunub onun qollarını ağacdan ayırdı.

***

... O, bəşəriyyəti intihara köklənmiş dəli yarımeymunlar irqi hesab edirdi.

• Tanınmış prodüser vəfat etdi
• Yazıçı Rüfət Əhmədzadə vəfat etdi
• "Ümid vəd eləmir o gözlər sənə..." - Abay Kunanbayev