Bu gün tanınmış fransız yazıçı, ədəbiyyat üzrə Nobel mükafatçısı Fransua Moriakın doğum günüdür.

Kulis.az onun əsərlərindən sitatları təqdim edir.

Birini sevmək - başqalarına görünməyən bir möcüzəni görmək deməkdir.

***

Əgər içindəki alov sönərsə, yanındakı ruhlar soyuqdan donub məhv olar.

***

Hər birimiz bizi sevənlər tərəfindən yoğurulub yenidən biçimlənirik. O sevgi keçib getsə belə, biz yenə də onların əsəri olaraq qalırıq - böyük ehtimalla onların özlərinin də tanımadığı və heç vaxt niyyət etdikləri kimi olmayan bir əsər.

***

«Mənə nə oxuduğunu de, sənə kim olduğunu deyim» fikri kifayət qədər doğrudur, lakin mənə dönə-dönə nə oxuduğunu desən, səni daha yaxşı tanıyardım.

***

Mərhəmətin sirri də elə bundadır: o, heç vaxt gecikmir.

***

İnsan sevgisi çox vaxt sadəcə iki zəifliyin bir-biri ilə qarşılaşmasından ibarətdir.

***

Dediyiniz hər şeyi yanlış anlayan biri ilə heç söhbət etmisinizmi? Bu, insanı heydən salır və işin qəribə tərəfi odur ki, özünü nə qədər çox izah etməyə çalışsan, məsələ bir o qədər dolaşığa düşür. Ən yaxın dostun isə nə vaxt zarafat etdiyini, nə vaxt ürəyini boşaltdığını və nə vaxt yorğun olduğunu anlayır. O, səni tanıdığı üçün dediklərinin arxasında başqa mənalar axtarmır.

***

Yazıçı, mahiyyət etibarilə, tənhalıqla barışmayan insandır.

***

Tanrı çarəsiz suallarımıza cavab vermir; O, sadəcə özünü bizə bəxş edir.

***

Qəbiristanlıq bizi kədərləndirir, çünki o, dünyada ölülərimizlə bir daha qarşılaşmadığımız yeganə məkandır.

***

Mən ilham gələndə yazıram. Yaradıcılıq dövründə hər gün yazıram; roman yarıda kəsilməməlidir. Axından çıxanda, artıq sanki diktə olunanları qələmə alırmış kimi hiss etməyəndə isə dayanıram.

***

Biz yalnız məhrum olduğumuz şeyləri dərindən dərk edirik.

***

Mənim qorxum ölümdən sonra unudulmaq deyil, əksinə, yetərincə unudulmamaqdır. Dediyimiz kimi, tarixdə qalan kitablarımız deyil, yoxsul ömürlərimizdir.

***

İnsanın əzəməti təfəkküründə deyil, nəğməsində gizlənir.

Rus dilindən tərcümə etdi: Aydan Ağayeva

• Alban-Udi dini icmasının nümayəndələri Gəncəsər Monastır Kompleksini ziyarət etdi
• Mirzə İbrahimovun nikahdankənar qızı - Uzun illər taleyi gizli qalan Zamira İbrahimova kimdir?
• "Bir dəfə özünü itirdinsə, iki seçimin var: ya əvvəlki... " - Herbert Vellsin sitatları