Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, xalq artisti Azər Paşa Nemətov xalq artistləri Ramiz Məlik və Məleykə Əsədova arasında baş verənlərə münasibət bildirib.

APA-nın məlumatına görə, o, xalq artistləri arasında baş verənləri təəssüf hissi ilə qarşıladığını qeyd edib:

“Məleykə Əsədova və Ramiz Məlik arasında baş verənlər xoşagəlməz haldır. Mən bu haqda tənqidi fikirlərimi və mövqeyimi də Ramiz Məlikə bildirmişəm. Onlar hər ikisi bizim gözəl sənətkarımızdır, indiyə qədər Akademik Milli Dram Teatrında yadda qalan, sevilən rollar yaradıblar. Baş verənlər sadəcə, anlaşılmazlıqdır, onlar bir-birini başa düşməyiblər. Ramiz Məlik Məleykə Əsədovadan üzr istəyib və bildirib ki, bu söhbətə son qoyulmasını istəyir. İnanıram ki, Məleykə Əsədova da onu anlayışla qarşılayacaq, üzrünü qəbul edəcək. Bizim teatr bir ailədir, ona görə də bu ailədə baş verənlərin kənara çıxmasını arzu etmirəm. Çünki hər ikisi bacarıqlı sənətkar kimi insanların rəğbətini, sevgisini qazanıb. Fəxri ad alan, seçilən insanlar davranışı ilə nümunə olmalıdırlar. Məleykə xanım mənə doğma və əziz adamdır. Ümumiyyətlə, mən aktyorları çox sevirəm. Çünki onlar ən çətin peşə sahibidirlər, fədakar işlə məşğuldurlar. Bu mənada rəhbəri olduğum teatrın hər bir üzvü mənə əzizdir. Ramiz Məliki məktəb illərindən, Məleykə Əsədovanı isə Gənclər Teatrından tanıyıram. Məleykə xanım bu illər ərzində öz peşəsinə ləyaqətlə xidmət edib. Biz onunla yeni “Cəhənnəm sakinləri” tamaşasının premyerasına hazırlaşırıq. O, rolunun öhdəsindən peşəkarlıqla, bacarıqla gəlib və inanıram ki, tamaşaçılar onu növbəti uğuru münasibəti ilə təbrik edəcək, sevinəcəklər. Hər ikisinə can sağlığı, yaradıcılıq uğurları arzu edirəm. İnanıram ki, gələcəkdə bu cür xoşagəlməz hallar olmayacaq, onlar öz rolları ilə pərəstişkarlarını sevindirəcəklər. Bizim gələcəkdə böyük tamaşalarımız, böyük uğurlarımız olacaq. Mən onların hər ikisinin kollektivimizin yanında olmasını arzu edirəm"

Xatırladaq ki, Xalq artisti Ramiz Məlik Xalq artisti Məleykə Əsədovanın sosial şəbəkələrdə paylaşdığı açıq-saçıq şəkillərə tənqidi fikir bildirmiş, daha sonra mətbuat vasitəsi ilə üzr istəmişdi.

• Xəlil Rza Ulutürk: Xalqın harayına çevrilən səs, imperiyanın qorxduğu şair
• İnsan öz içində nə vaxt ölür? – “Tənhalıq həsrəti” haqqında
• Dost, yoxsa düşmən? – Kurt Kobeyn "Necə varsansa, elə gəl" deyərkən kimə müraciət edirdi?